راولپنڈی: راولپنڈی کے علاقے ڈھوک سیداں میں امام بارگاہ کے قریب نا معلوم ملزمان کی فائرنگ سے دو پولیس اہلکار ہلاک ہو گئے۔

ڈان نیوز کے مطابق پیر کے روز پولیس اہلکار ڈھوک سیداں میں امام بارگاہ کے قریب ڈیوٹی دے رہے تھے جب نا معلوم موٹر سائیکل پر سوار ملزمان نے انہیں نشانہ بنایا۔

حملے میں ایک پولیس اہلکار اور ایک راہگیر زخمی بھی ہوئے ہیں زخمیوں کو قریبی ہسپتال منتقل کر دیا گیا ہے۔ جہاں ان کی حالت تشویشناک بتائی جا رہی ہے۔

ریس کورس پولیس اسٹیشن کے ایس ایچ او راجہ مصدق نے بتایا کہ واقعہ میں تین پولیس اہکار زخمی ہوئے تھے جنہیں کمبائنڈ ملٹری ہسپتال منتقل کیا گیا ان میں سے دو نے زخموں کی تاب نہ لاتے ہوئے دم توڑ دیا۔ جبکہ ایک اہلکار کی حالت تشویشناک ہے۔

سٹی پولیس آفیسر (سی پی او) عمر اختر حیات نے جائے واقعہ کے دورہ کے دوران اس واقعے کی شدید مزمت کی اور جلد از جلد مجرموں کو گرفتار کرنے کے عزم کا اظہار کیا۔

انہوں نے کہا کہ عینی شاہدین کی مدد سے حملہ آوروں کے خاکے تیار کیئے جا رہے ہیں جبکہ واقعہ کے بعد شہر بھر میں تمام امام بارگاہوں پر سیکورٹی میں اضافہ کیا گیا ہے۔