دہلی: ہندوستان کی فوج کے 597 افسران اور اہلکاروں نے گذشتہ پانچ سال میں خو دکشی کی جبکہ 2215 فوجیوں نے ریٹائرمنٹ کے لیے درخواستیں جمع کروائیں۔

پریس ٹرسٹ آف انڈیا کی ایک رپورٹ کے مطابق ایوان بالا( راجیو سبھا) میں ایک سوال کے جواب میں وزیر دفاع ارون جیٹلے کی جانب سے جمع کروائے گئے تحریری جواب میں کہا گیا ہے کہ 2009 سے 2013 کے دوران پانچ سال میں 597 فوجی اہلکاروں نے خودکشی کی، خودکشی کرنے والوں میں آرمی کے 498 اہلکار، ائر فورس کے 83 اور بحریہ کے 16 اہلکار شامل ہیں۔

ارون جیٹلے کا تحریری جواب میں کہنا تھا کہ سب سے زیادہ خودکشیاں 2010 میں 116 ہوئی تھیں جبکہ 2013 میں 86اہلکاروں نے خود کشی کی تھی جو کہ گزشتہ 5 سالوں میں سب سے کم تعداد ہے۔

ان کا مزید کہنا تھا کہ فوج سے وقت سے قبل ریٹائرمنٹ کے لیے 2215 اہلکاروں نے درخواستیں جمع کروائیں جن میں سے 1349 اہلکاروں کو ریٹائرمنٹ مل سکی۔

وزیر دفاع نے بتایا کہ حکومت کی جانب سے ایسے اقدامات کیے جا رہے ہیں جن کے باعث فوجی اہلکاروں کو بغیر کسی ذہنی دبائو کے اپنی ڈیوٹی انجام دینے میں آسانی ہو سکے۔

ایک اور سوال کے جواب میں وزیر دفاع نے بتایا کہ گذشتہ تین سال میں ائر فورس کے 19 طیارے حادثات میں تباہ ہوئے جبکہ ان حادثات میں پانچ ائر فورس اہلکار اور ایک عام شہری ہلاک ہوئے۔