کراچی: پاکستان کے سب سے بڑے شہر کراچی کے علاقے لانڈھی 89 میں آج جمعرات کی صبح ہونے والے دھماکے سے ایک رینجرز اہلکار ہلاک، جبکہ چھ زخمی ہوگئے۔

یہ دھماکہ سندھ رینجرز کے ایک ٹرک کے نزدیک کیا گیا جو ایک موٹر سائیکل میں نصب تھا۔

زخمی افراد کو فوری طور پر جناح پوسٹ گریجویٹ میڈیکل سینٹر منتقل کردیا گیا۔

ایک سینیئر رینجرز اہلکار نے عالمی خبر رساں ادارے اے ایف پی کو بتایا کہ رینجرز کے ٹرک میں تقریباً 10 اہلکار سوار تھے۔

بم ڈسپوزل اسکواڈ کے مطابق دھماکے میں تین سے چار کلو دھماکہ خیز مواد استعمال کیا گیا جبکہ اس واقعہ کے بعد علاقے میں سرچ آپریشن کے دوران متعدد مشتبہ افراد کو حراست میں لے لیا گیا۔

دوسری جانب ڈی جی رینجرز نے میڈیا سے بات کرتے ہوئے کہا ہے کہ لانڈھی بم دھماکے جیسے واقعات رینجرز کا حوصلہ پست نہیں کرسکتے اور کراچی آپریشن سے شہر کے حالات میں بہتری آرہی ہے۔