پی سی بی کا محمد رضوان کو ون ڈے اور ٹی 20 کا کپتان مقرر کرنے کا فیصلہ
پاکستان کرکٹ بورڈ ( پی سی بی) نے قومی ٹیم کے وکٹ کیپر محمد رضوان کو ون ڈے اور ٹی 20 کا کپتان بنانے کا فیصلہ کرلیا۔
ڈان نیوز کے مطابق ذرائع نے بتایا ہے کہ قومی ٹیم کے آل راؤنڈر سلمان علی آغا وائٹ بال ٹیم کے نائب کپتان ہوں گے۔
ذرائع کے مطابق عاقب جاوید کو چیف سلیکٹر بنائے جانے کا امکان ہے جبکہ دورہ آسٹریلیا اور سینٹرل کنٹریکٹ کے حوالے سے اسلام آباد میں چیئرمین پی سی بی محسن نقوی نے سلیکشن کمیٹی، محمد رضوان اور سلمان علی آغا سے ملاقات بھی کی ہے۔
پاکستان کرکٹ بورڈ کے چیئرمین محسن نقوی آج پریس کانفرنس میں اہم فیصلوں کا اعلان کریں گے۔
واضح رہےکہ 2 اکتوبر قومی ٹیم کے مایہ ناز بلے باز بابر اعظم نے اپنی پرفارمنس پر توجہ دینے کے لیے ون ڈے اور ٹی20 ٹیم کی قیادت سے استعفیٰ دے دیا تھا۔
انہوں نے استعفیٰ دینے کے بعد اپنے بیان میں کہا تھا کہ وہ کپتانی سے ہٹ کر اپنی پرفارمنس پر توجہ دینا چاہتے ہیں اور بحیثت کھلاڑی ٹیم کے لیے اپنی خدمات جاری رکھیں گے۔
لائیو ٹی وی