بیشتر ارکان پارلیمنٹ کے پاس اسمگل شدہ گاڑیاں ہیں، فیصل واڈا
سینیٹر فیصل واڈا قائمہ کمیٹی برائے خزانہ کے سامنے انکشاف کیا ہے کہ بیشتر ارکان پارلیمنٹ کے پاس اسمگل شدہ گاڑیاں ہیں۔
ڈان نیوز کے مطابق سینیٹر سلیم مانڈوی والا کی زیر صدارت سینیٹ کی قائمہ کمیٹی برائے خزانہ کا اجلاس ہوا۔
اجلاس میں سینیٹر فیصل واوڈا نے دعویٰ کیا کہ بیشتر ارکان پارلیمنٹ کے پاس اسمگل شدہ گاڑیاں ہیں، میں کاروباری آدمی ہوں اس لیے مجھے معلوم ہے اسکینڈل میں کون کون ملوث ہے اور مجھے نام لینے میں ایک سیکنڈ بھی نہیں لگے گا۔
ان کا کہنا تھا کہ ایس آئی ایف سی کی پالیسی کو سبوتاژ کیا جارہا ہے، وزیر خزانہ، وزیر صنعت، متعلقہ سیکریٹریز اور چیئرمین ایف بی آر کو بلا کر پوچھا جائے۔
کمیٹی نے بجٹ میں تجویز کردہ الیکٹرک اور ہائبرڈ گاڑیوں پر ٹیکس کی شرح بڑھانے کی مخالفت کردی۔
سینیٹر فیصل واوڈا نے کہا کہ پوری دنیا میں الیکٹرک گاڑیوں کی حوصلہ افزائی کی جارہی ہے، ایک پالیسی بنا کر جب اس پر نظرثانی کی جاتی ہے تو مسائل میں اضافہ ہوتا ہے، ٹیکس اور پالیسیوں میں تبدیلی کی وجہ سے کوئی اس ملک میں انڈسٹری نہیں لگاتا۔
اجلاس کے دوران چیئرمین ایف بی آر ٹیکسوں کی وجہ سے مہنگائی میں اضافے سے بھی لاعلم نکلے۔
چیئرمین کمیٹی نے چیئرمین ایف بی آر سے سوال کیا کہ کیا مہنگائی 12 فیصد رہے گی؟ جس پر چیئرمین ایف بی آر نے جواب دیاکہ مہنگائی کا تو علم نہیں ہے لیکن ٹیکسوں سے ایف بی آر محصولات میں اضافہ ہو گا۔
لائیو ٹی وی