یورپی یونین دہشتگردی کے خلاف پاکستان کی کوششوں کا معترف ہے، یلوا جانسن
یورپی کمشنر برائے امور داخلہ و مائیگریشن یلوا جانسن نے کہا ہے کہ یورپی یونین دہشت گردی کے خلاف پاکستان کی کوششوں کا معترف ہے۔
دفتر خارجہ میں وزیر مملکت برائے خارجہ امور حنا ربانی کھر کے ہمراہ مشترکہ پریس کانفرنس سے خطاب کرتے ہوئے یلوا جانسن نے کہا کہ میں پاکستان میں اپنے پرجوش استقبال پر انتہائی شکر گزار ہوں۔
مزید پڑھیں: پاکستانی مہاجرین کو یورپی یونین میں داخلے سے روک دیا گیا
یلوا جانسن نے کہا کہ یورپی یونین اور پاکستان کے درمیان 60 سالہ تعلق ہے، پاکستان یورپی یونین کا اہم اسٹریٹجک پارٹنر رہا ہے، تجارت سمیت کئی شعبوں میں دونوں کے درمیان مؤثر تعلق ہے جسے ہم مزید آگے بڑھا سکتے ہیں۔
انہوں نے کہا کہ یورپی یونین دہشت گردی کے خلاف پاکستان کی کوششوں کا معترف ہے، سیکیورٹی ایک ایسا شعبہ ہے جس میں دونوں ممالک کے درمیان مزید گہرے تعاون کی ضروت ہے۔
یلوا جانسن نے کہا کہ افغان مہاجرین کے لیے اقدامات پر پاکستان داد کا مستحق ہے، اسی طرح یورپی یونین بھی اب 45 لاکھ یوکرینی مہاجرین کو پناہ دے رہا ہے۔
انہوں نے کہا کہ مجھے آج خوشی ہے کہ ہم یہاں ہجرت اور نقل مکانی پر ایک ڈائیلاگ شروع کرنے کے لیے اکٹھے ہوئے ہیں، ہم پہلے سے موجود تعاون کو مزید مؤثر انداز میں آگے بڑھا سکتے ہیں۔
یہ بھی پڑھیں: یورپی یونین کی پاکستان میں حکومت اور پارلیمنٹ کے درمیان عدم تعاون کی نشاندہی
ان کا کہنا تھا کہ یورپی یونین کو کئی شعبوں میں ہنر مند افرادی قوت کی ضرورت ہے، پاکستان اس شعبے میں اہم معاونت کر سکتا ہے، اس کے ساتھ ساتھ اسمگلنگ کی روک تھام کے لیے قانونی و غیر قانونی ہجرت کے درمیان فرق واضح رکھنا بھی ضروری ہے۔
غیر قانونی تارکین وطن کی آمد کے حوالے سے یورپی یونین کے خدشات سے واقف ہیں، حنا ربانی کھر
اس موقع پر حنا ربانی کھر نے خطاب کرتے ہوئے کہا کہ پاکستان نے 30 لاکھ مہاجرین کو پناہ دی، میں دنیا میں اور کسی ایسے ملک کو نہیں جانتی جس نے اتنی بڑی تعداد میں مہاجرین کو پناہ اور دیگر سہولیات فراہم کی ہوں۔
انہوں نے کہا کہ اس راستے سے غیر قانونی تارکین وطن کی آمد کے حوالے سے یورپی یونین کے خدشات سے پاکستان بخوبی واقف ہے، اس حوالے سے ہر ممکن اقدامات اٹھائے جارہے ہیں کہ براستہ پاکستان غیر قانونی تارکین وطن کی آمد کا سلسلہ کم سے کم کیا جا سکے۔
مزید پڑھیں: پاکستان اور یورپی یونین کے درمیان دوطرفہ تجارت میں 78فیصد اضافہ
انہوں نے کہا کہ یورپی یونین کمشنر کو پاکستان آمد پر خوش آمدید کہتے ہیں جو آئندہ برس کی پہلی ششماہی میں نقل مکانی اور ہجرت پر یورپی یونین کی جانب سے ایک ڈائیلاگ شروع کرنے کے عزم کے ساتھ آئی ہیں۔
ان کا کہنا تھا کہ اس کے ساتھ ساتھ ہم امید کرتے ہیں کہ جائز اور قانونی نقل مکانی کے لیے نئے راستے کھولے جائیں گے، پاکستان کے پاس قابلیت سے بھرپور افرادی وقت موجود ہے جس کا یورپی یونین کو کمی کا سامنا ہے۔
حنا ربا کھر نے کہا کہ ہم دونوں ممالک کے درمیان تجارت اور ڈائیلاگ کے فروغ کے لیے مسلسل کوشش جاری رکھیں گے جو کہ دونوں فریقین کے مفاد میں ہے۔
مزید پڑھیں: یورپی یونین کمیشن کا سیلاب متاثرین کیلئے مزید امداد کا وعدہ
خیال رہے کہ یورپی کمشنر برائے داخلہ و مائیگریشن یلوا جانسن دورہ پاکستان پر اسلام آباد پہنچی ہیں، پاکستان میں یورپی یونین کی سفیر ڈاکٹر رینا کیونکا نے اسلام آباد پہنچنے پر کمشنر کا استقبال کیا۔
انہوں نے اپنی ٹوئٹ میں بتایا کہ ’یورپی کمشنر برائے امور داخلہ پاکستان کے ساتھ ہجرت اور نقل و حمل اور سیکیورٹی پر یورپی یونین کے تعاون کو مزید گہرا کرنے کے لیے اہم دورہ کر رہی ہیں‘۔
بعد ازاں یلوا جانسن نے بھی ٹوئٹ کرتے ہوئے بتایا کہ یہ دورہ یورپی یونین اور پاکستان کے درمیان نقل مکانی اور ہجرت پر مباحثے اور سیکیورٹی تعاون کے حوالے سے اہم ہے۔
لائیو ٹی وی