قطر نے ورلڈ کپ کے دوران سیکیورٹی کیلئے شہریوں کو بھرتی کرلیا
قطر نے ورلڈ کپ کے دوران اسٹیڈیم کی سیکیورٹی کو بڑھانے کے لیے ملک میں سویلین ملازمتوں کے لیے بھرتی کچھ شہریوں کو طلب کر لیا ہے۔
ڈان اخبار میں شائع خبررساں ادارے ’اے ایف پی‘ کی رپورٹ کے مطابق 32 ملکی ٹورنامنٹ کے دوران 10 لاکھ سے زائد شائقین کی آمد متوقع ہے، اس دوران قطر بڑے پیمانے پر انتظامات کے لیے غیر ملکی سیکیورٹی فورسز کے علاوہ اپنی فوج اور پولیس پر بھی انحصار کرے گا۔
سال 2014 سے 18 سے 35 سال کی عمر کے تمام قطری مردوں کے لیے 4 ماہ تک فوج کے ساتھ تربیت لازمی قرار دی گئی، ڈیوٹی سے بچنے کی کوشش کرنے والوں پر ایک سال قید اور 50 ہزار قطری ریال (13 ہزار 700 ڈالر) جرمانہ عائد ہو سکتا ہے۔
یہ بھی پڑھیں: قطر کا ورلڈ کپ کیلئے آنے والے شائقین کی ٹینٹ میں میزبانی کا فیصلہ
امیر قطر شیخ تمیم بن حمد الثانی نے ایک حالیہ انٹرویو میں کہا کہ وہ قومی خدمات کے دائرہ کار میں خواتین کی شمولیت پر بھی غور کر رہے ہیں۔
ایک سرکاری عہدیدار نے ایک بیان میں کہا کہ ’قطر کا قومی خدمت پروگرام ورلڈ کپ کے دوران معمول کے مطابق جاری رہے گا‘۔
انہوں نے کہا کہ ’اپنی لازمی سروس مکمل کرنے والے ملازمین کی مختصر تعداد کواس مقصد کے لیے طلب کیے جانے سے انہیں اپنی سروس کی تکمیل میں مدد ملے گی، یہ معمول کی کارروائی ہے اور ہر سال بڑی عوامی تقریبات کے دوران ایسا کیا جاتا ہے‘۔
لائیو ٹی وی