ٹی 20 ورلڈ کپ: روایتی حریفوں پاک ۔ بھارت میچ کی تمام ٹکٹس فروخت

ویب ڈیسک شائع September 15, 2022

میچ کی اضافی اسٹینڈنگ روم ٹکٹس بھی چند ہی منٹوں میں فروخت ہوگئیں — فائل فوٹو: اے ایف پی

انٹرنیشنل کرکٹ کونسل (آئی سی سی) نے کہا ہے کہ پاکستان اور بھارت کے درمیان ٹی 20 ورلڈ کپ میچ کی تمام ٹکٹس فروخت ہوچکی ہیں۔

آئی سی سی نے اپنے جاری کردہ بیان میں کہا کہ پاکستان اور بھارت کے درمیان 23 اکتوبر کو میلبورن کرکٹ گراؤنڈ میں ہونے والے میچ کی تمام ٹکٹس فروخت ہوگئی ہیں، جبکہ اضافی اسٹینڈنگ روم ٹکٹس بھی چند ہی منٹوں میں فروخت ہوگئی ہیں۔

آئی سی سی نے کہا کہ میچ قریب آتے ہی باضابطہ طور پر ری سیل پلیٹ فارم کا انعقاد کیا جائے گا، جہاں شائقین فیس ویلیو پر ٹکٹوں کا تبادلہ کر سکتے ہیں۔

بیان میں مزید کہا گیا ہے 27 اکتوبر کو سڈنی کرکٹ گراؤنڈ پر ڈبل ہیڈر میں جنوبی افریقا کا بنگلا دیش جبکہ انڈیا کا گروپ اے کی رنر اپ ٹیم سے مقابلے کی تمام ٹکٹس بھی فروخت ہو چکی ہیں اور شائقین کو اضافی ٹکٹ دستیاب ہونے کی صورت میں انتظار کرنے کی ترغیب دی گئی ہے۔

انٹرنیشنل کرکٹ کونسل کہا کہ 22 اکتوبر کو سڈنی کرکٹ گراؤنڈ پر آسٹریلیا کے نیوزی لینڈ کے خلاف ہونے والے پہلے سپر 12 میچ، ڈبل ہیڈر میں 30 اکتوبر کو پرتھ اسٹیڈیم میں پاکستان کا گروپ اے کی رنر اپ ٹیم اور بھارت اور جنوبی افریقہ کے درمیان ہونے والے مقابلے کے لیے بہت محدود ٹکٹس بچی ہیں۔

اسی طرح 3 نومبر کو سڈنی گراؤنڈ میں پاکستان اور جنوبی افریقہ کے درمیان ہونے والے میچ کے لیے بھی محدود ٹکٹس بچی ہیں۔

یہ بھی پڑھیں: ٹی20 ورلڈکپ کے لیے قومی اسکواڈ کا اعلان، فخر زمان باہر

کرکٹ کونسل نے کہا ہے کہ ٹی ٹوئنٹی ورلڈ کپ کے لیے 5 لاکھ شائقین نے ٹکٹس خریدی ہیں، عالمی ایونٹ ایک ماہ بعد منعقد ہوگا۔

16 ملکی ٹورنامنٹ کا آغاز 16 اکتوبر کو سری لنکا کا جیلونگ میں نمیبیا کے خلاف میچ سے ہوگا، جیلونگ پہلی بار آسٹریلیا کی میزبانی میں منعقد ہونے والے عالمی ایونٹ کے سات مقامات میں سے ایک ہے۔

گزشتہ سال پاکستان اور بھارت کے درمیان ٹی ٹوئنٹی ورلڈ کپ مقابلے کو ٹیلی ویژن پر ریکارڈ 16 کروڑ 70 لاکھ افراد نے دیکھا تھا۔

روایتی حریفوں کے درمیان اس میچ میں پاکستان نے بھارت کو ورلڈ کپ میں پہلی بار شکست دے کر ایک نئی تاریخ رقم کی تھی۔

اس سنسنی خیز مقابلے میں قومی ٹیم نے روایتی حریف کو 10 وکٹوں سے عبرتناک شکست دی تھی۔