تحریک انصاف، مسلم لیگ (ق) پنجاب اور مرکز میں مل کر کام کرنے کیلئے تیار

ویب ڈیسک شائع August 12, 2018

پاکستان تحریک انصاف (پی ٹی آئی) اور مسلم لیگ (ق) کے رہنماؤں نے اس عزم کا اعادہ کیا ہے کہ وہ مرکز اور پنجاب میں مل کر کام کریں گے۔

لاہور میں مسلم لیگ (ق) کے نائب صدر چوہدری پرویز الٰہی کے ہمراہ پریس کانفرنس کرتے ہوئے پی ٹی آئی کے رہنما جہانگیر ترین کا کہنا تھا کہ آئندہ حکومت میں پنجاب کو ایک مضبوط بلدیاتی نظام دیں گے۔

جہانگیر ترین نے واضح کیا کہ صوبے میں نیا قانون بنا کر بلدیاتی الیکشن کروائے جائیں گے۔

ان کا مزید کہنا تھا کہ ان کی حکومت اداروں کو کمزور نہیں بلکہ مضبوط بنائے گی جبکہ شریف برادران نے 10 سال میں پنجاب کو کتنا نقصان پہنچایا، عوام کو اس حوالے سے آگاہ کیا جائے گا۔

مسلم لیگ (ق) کے حوالے سے بات کرتے ہوئے جہانگیر ترین کا کہنا تھا کہ یہ پنجاب میں حکومت سازی میں تحریک انصاف کی اتحادی ہے۔

جب ان سے سوال کیا گیا کہ کیا علیم خان کو پنجاب کا وزیرِاعلیٰ بنایا جائے گا؟ جس پر ان کا کہنا تھا کہ یہ فیصلہ عمران خان کو کرنا ہے، اور وہ جو بھی فیصلہ کریں گے جس کے حوالے سے وہ پارٹی رہنماؤں کو آگاہ کردیں گے۔

حکومت سازی میں متحرک رہنے اور اپنا ذاتی طیارہ پارٹی کے لیے استعمال کرنے کے سوال پر جہانگیر ترین نے کہا کہ یہ سب انہوں نے پارٹی کے لیے کیا، جہاز ہونے سے جلدی کام ہوجاتا ہے، حرکت میں برکت ہے۔

جہانگیر ترین نے مسلم لیگ (ق) کے رہنماؤں سے ہونے والی بات چیت کے حوالے سے بتایا کہ لیگی قیادت سے اسپیکر کے الیکشن کے حوالے سے بات چیت ہوئی ہے۔

یہ بھی پڑھی: پی ٹی آئی اور مسلم لیگ (ن) میں نظریاتی فرق ہے بھی یا نہیں؟

انہوں نے تحریک انصاف کا ساتھ دینے پر مسلم لیگ (ق) کا شکریہ ادا کرتے ہوئے کہا کہ پنجاب کی حکومت وہ مسلم لیگ (ق) کے ساتھ اتحاد کے ساتھ چلائیں گے۔

انہوں نے کہا کہ دونوں جماعتیں مل کر صوبے میں ایسی حکومت لائیں گی جو تاریخ میں مثال نہیں ملے گی۔

مسلم لیگ (ق) کے نائب صدر چوہدری پرویز الٰہی نے مسلم لیگ (ن) کے صدر شہباز شریف کو تنقید کا نشانہ بناتے ہوئے کہا کہ سابق وزیرِاعلیٰ پنجاب نے گزشتہ 10 سال میں صوبے کا بیڑہ غرق کردیا۔

انہوں نے کہا کہ شہباز شریف کے پاس کوئی اختیار نہیں اور نہ ہی وہ کوئی کام کر سکتے ہیں بلکہ انہوں نے تمام ادارے تباہ کردیے۔

چوہدری پرویز الٰہی کا کہنا تھا کہ سابق وزیرِاعلیٰ نے اپنے دورِ اقتدار میں ایسے منصوبے شروع کیے جو پائیدار نہیں تھے اور نہ ہی ان سے غریب عوام کو فائدہ پہنچا۔

تحریک انصاف کے وفد سے بات چیت کے حوالے سے چوہدری پرویز الٰہی نے کہا کہ جہانگیر ترین سے پنجاب کے مسائل پر تبادلہ خیال کیا گیا۔

انہوں نے بتایا کہ اسپیکر اور وزیر اعلی پنجاب کے حوالے سے مشاورت کی گئی ہے۔

چوہدری پرویز الٰہی کا کہنا تھا کہ صوبے میں ایسا بلدیاتی نظام لانا چاہتے ہیں جس کے ذریعے اختیارات نچلی سطح تک منتقل ہوں۔