ٹیم کارکردگی دکھا رہی ہے لیکن ابھی بہت کچھ سیکھنا ہے، سرفراز
قومی ٹیم کے کپتان سرفراز احمد نے کہا ہے کہ پاکستانی ٹیم توقعات کے مطابق کارکردگی دکھا رہی ہے لیکن ابھی بھی ٹیم کو بہت کچھ سیکھنا ہے۔
پاکستان اور انگلینڈ کے درمیان دو ٹیسٹ میچوں کی سیریز کا دوسرا میچ کل سے لیڈز میں کھیلا جائے گا جہاں پاکستانی ٹیم کو سیریز میں 1-0 کی برتری حاصل ہے۔
پاکستان کے پاس انگلینڈ میں سیریز جیتنے کا نادر موقع ہے جہاں آخری بار قومی ٹیم نے 1996 میں انگلش سرزمین پر سیریز جیتنے کا اعزاز حاصل کیا تھا اور اگر قومی ٹیم یہ میچ جیت جاتی ہے یا ڈرا کرتی ہے تو وہ سیریز اپنے نام کر لے گی۔
میچ سے ایک دن قبل پریس کانفرنس سے خطاب کرتے ہوئے سرفراز نے کہا کہ یہ ہمارے لیے نیک شگون ہے کہ ٹیم تینوں شعبوں میں توقعات کے مطابق کارکردگی دکھا رہی ہے لیکن ہمیں ابھی بھی کافی کچھ سیکھ کر بہت سے اہداف حاصل کرنے ہیں۔
انہوں نے تصدیق کی کہ دوسرے میچ میں انجری کا شکار بابر اعظم کی جگہ نوجوان عثمان صلاح الدین کو فخر زمان پر ترجیح دیتے ہوئے صلاحیتوں کے اظہار کا موقع فراہم کیا جائے گا۔
قومی ٹیم کے کپتان نے کہا کہ پاکستانی ٹیم کھلے میدان میں بھرپور پریکٹس کی لیکن انہوں نے پچ کے حوالے سے کوئی رائے دینے سے انکار کردیا۔
لائیو ٹی وی