فوزیہ قصوری نے ایک مرتبہ پھر تحریک انصاف سے علیحدگی اختیار کرلی
لاہور: پاکستان تحریک انصاف (پی ٹی آئی) کی بانی رکن فوزیہ قصوری نے پارٹی رکنیت سے استعفیٰ دیتے ہوئے ایک مرتبہ پھر اپنی جماعت سے کنارہ کشی اختیار کرلی۔
فوزیہ قصوری نے اپنے استعفے میں شکوہ کیا کہ ’چیئرمین تحریک انصاف عمران خان نے جماعت کی باگ دوڑ ایسے افراد کو تھمادی، جن کے خلاف میں پارٹی کے قیام سے لے کر اب تک جدوجہد کررہی ہوں‘۔
سماجی رابطے کی ویب سائٹ ٹویٹر پر اپنا استعفیٰ پیش کرتے ہوئے ہوئے فوزیہ قصوری کا کہنا تھا کہ 2013 سے تحریک انصاف جس سمت میں گامزن ہے وہ اس سے قطعی مطمئن نہیں ہیں، اور نہ ہی اب یہ جماعت پاکستان میں تبدیلی کے خواہشمند عوام کی امنگووں کی ترجمانی کررہی ہے۔
یہ بھی پڑھیں: فوزیہ قصوری کا ‘نئے پاکستان’ کو الوداع
اپنے استعفیٰ میں انہوں نے کہا کہ عمران خان کی جماعت اب کارکنان کے بجائے انتخابات میں کامیاب ہونے والے افراد کو ترجیح دے رہی ہے، جبکہ کارکنان جماعت کے لیے سر دھڑ کی بازی لگا دیتے ہیں، افسوس یہ معاملات تابوت میں آخری کیل ٹھوکنے کے مترادف ہیں۔
I sent this message of resignation to @ImranKhanPTI and other leaders in the party a few moments ago. A message to my supporters in and outside PTI will follow shortly. May Allah guide us All. pic.twitter.com/e4dMlNGesD
— Fauzia Kasuri (@FauziaKasuri) May 23, 2018
اس ضمن میں انہوں نے عمران خان پر زور دیا کہ ان کا استعفیٰ منظور کیا جائے اور وہ مزید تحریک انصاف کے اقدامات کا دفاع کرنے سے قاصر ہیں۔
اس معاملے پر ردعمل دیتے ہوئے تحریک انصاف کے ترجمان فواد چوہدری کا کہنا تھا کہ ’فوزیہ قصوری نے استعفیٰ اس لیے دیا کیونکہ وہ جانتی تھیں کہ ممکنہ طور پر انہیں پارٹی سے نکالا جاسکتا ہے‘۔
مزید پڑھیں: فوزیہ قصوری دوبارہ پی ٹی آئی میں شامل
انہوں نے انکشاف کیا کہ اخبارات میں تحریک انصاف کی مخالفت میں مضمون لکھنے پر فوزیہ قصوری کو شو کاز نوٹس بھی جاری کیا گیا تھا۔
جب فواد چوہدری سے فوزیہ قصوری کے اس الزام کے بارے میں سوال کیا گیا کہ تحریک انصاف پہلے سے منتخب افراد کو ترجیح دے رہی ہے تو انہوں نے جواب دیا کہ ایسے کسی فرد کو پارٹی میں شامل نہیں کیا گیا جو نیب یا کسی عدالت میں بدعنوانی کے مقدمے کا سامنا کررہا ہو۔
یہ خبر ڈان اخبار میں 24 مئی 2018 کو شائع ہوئی۔
لائیو ٹی وی