دفاعی چیمپیئن پشاور زلمی فائنل کھیلنے کراچی پہنچ گئی
دفاعی چیمپیئن پشاور زلمی کی ٹیم پاکستان سپر لیگ کے تیسرے ایڈیشن کا فائنل کھیلنے کراچی پہنچ گئی ہے۔
کراچی کے نیشنل اسٹیڈیم میں اتوار کو شیڈول فائنل کھیلنے کیلئے پشاور زلمی کی ٹیم جمعرات کی رات 10 بجے لاہور سے کراچی کیلئے روانہ ہوئی اور ٹیم تقریباً 12 بجے کراچی پہنچی۔
پشاور زلمی کی ٹیم کے ہمراہ غیرملکی کھلاڑی بھی کراچی آئے ہیں جس میں کپتان ڈیرن سیمی، آندرے فلیچر، لیام ڈاسن اور کرس جورڈن بھی شامل ہیں جبکہ بنگلہ دیش کے تمیم اقبال کی بھی کراچی آمد متوقع ہے۔
ٹیم کی کراچی آمد کے موقع پر سیکیورٹی انتظامات کیے گئے تھے اور ایئرپورٹ سے ہوٹل تک پہنچانے کے دوران سیکیورٹی کے پیش نظر شاہراہ فیصل کے دونوں اطراف روڈ کو بند کردیا گیا جبکہ اس دوران شہر کی سب سے اہم شاہراہ کے تمام پیٹرول پمپ بھی بند کرا دیے گئے۔
پشاور زلمی کے کھلاڑیوں نے کراچی پہنچنے پر خوشی کا اظہار کیا اور ٹیم کے ہمراہ ایئرپورٹ پر پاکستان زندہ باد کے نعرے بھی لگائے۔
دفاعی چیمپیئن پشاور زلمی اور اسلام آباد یونائیٹڈ کے درمیان ایونٹ کا فائنل اتوار کو کراچی کے نیشنل اسٹیڈیم میں کھیلا جائے گا۔
لائیو ٹی وی