۔۔۔فائل فوٹو۔

اسلام آباد: پاکستان کی جانب سے سزائے موت پر پابندی کے خاتمے کے اقدام کی انسانی حقوق کے ادارے ایمنسٹی انٹرنیشنل نے مذمت کرتے ہوئے اسے ’حیران کن‘ قرار دیا ہے۔

واضح رہے کہ دنیا کے تقریباً 150 ممالک میں پہلے ہی سزائے موت کو یا تو ختم کردیا گیا ہے یا پھر اس پر عمل نہیں کیا جارہا۔

2008ء میں پاکستان کی سابقہ حکومت نے اس پر پابندی لگا رکھی تھی جسکی مدت 30 جون تھی۔

وزارت داخلہ کے ایک ترجمان عمر حامد خان کا کہنا ہے کہ موجودہ حکومت کا اس پابندی کی مدت میں اضافہ کرنے کا ارادہ نہیں۔

خان کا کہنا ہے کہ وزیراعظم نواز شریف انسانی بنیادوں پر معاف کیے جانے والے قیدیوں کے علاوہ تمام وہ قیدی جو سزائے موت کا انتظار کررہے ہیں، کی سزا پر عمل درآمد کرنے کا ارادہ رکھتے ہیں۔

پاکستان، امریکہ، چین، نائجیریا اور چند دیگر ممالک ان ملکوں کی فہرست میں شامل ہیں جہاں ابھی بھی یہ سزا دی جاتی ہے۔

ایمنسٹی انٹرنیشنل کے مطابق ملک میں تقریباً 8000 قیدی سزائے موت کا انتظار کررہے ہیں جبکہ حکومت ان کی تعداد 400 بتاتی ہے۔

ایمنسٹی کے ایک بیان کے مطابق، سزائے موت کی موجودگی میں معصوم افراد کو ہلاک کیے جانے کا خطرہ بنا رہے گا۔

’پاکستان میں منصفانہ مقدموں کی خلاف ورزیوں کے باعث اس خطرے میں مزید اضافہ ہوجاتا ہے جبکہ اس سے پاکستان کی بین الاقوامی ذمہ داریوں کی بھی خلاف ورزی ہوتی ہے‘

پاکستان کا کہنا ہے کہ سزائے موت سے کراچی اور افغانستان سے ملحقہ علاقوں میں تشدد کو قابو کرنے میں مدد ملتی ہے جہاں طالبان روزانہ کی بنیادوں پر حملے کرتے ہیں۔

ایک سوال کے جواب میں خان کا کہنا تھا کہ امریکہ میں بھی سزائے موت کا قانون موجود ہے جہاں انکے مطابق دنیا کا بہترین عدالتی نظام موجود ہے۔

خان کا کہنا تھا ’ہمارے پاس قابل اعتماد عدالتی نظام موجود ہے اور قانون کو اپنا راستہ اختیار کرنے کی اجازت ملنی چاہئے‘