جنوبی وزیرستان:پاک فوج کی جوابی فائرنگ سے 3 دہشت گرد ہلاک
پاک فوج نے قبائلی علاقے جنوبی وزیرستان میں افغان سرحد سے دو چوکیوں پر دہشت گردوں کے حملے کو ناکام بنا دیا اور جوابی فائرنگ سے 3 دہشت گرد ہلاک ہوگئے۔
پاک فوج کے تعلقات عامہ (آئی ایس پی آر) کے مطابق پاک فوج کے جوانوں نے دہشت گردوں کا حملہ پسپا کردیا اور اس دوران فائرنگ کے تبادلے میں تین حملہ آور مارے گئے جبکہ متعدد دہشت گردوں کو زخمی کردیا گیا۔
جنوبی وزیرستان میں دوچوکیوں پر حملہ افغانستان سے ہوا تاہم پاک فوج نے فوری طور پر بھرپور کارروائی کرتے ہوئے تین حملہ آوروں کو ہلاک کردیا۔
مزید پڑھیں:افغانستان سے دہشتگردوں کا حملہ، زخمی سپاہی چل بسا
خیال رہے کہ رواں سال جنوری کے اواخر میں سرحد پار سے دہشت گردوں نے حملہ کیا تھا جس کے نتیجے میں ایک سپاہی شہید ہوا تھا جبکہ سرحدی کشیدگی کے باعث پاک افغان سرحد کو کافی عرصے تک بند کررکھا گیا تھا۔
بعدازاں فروری میں پاک فوج نے پاک افغان سرحد پر دہشت گرد تنظیم ’جماعت الاحرار‘ کے ٹھکانوں پر حملہ کرکے کئی ٹھکانوں کو تباہ کردیا تھا۔
یہ بھی پڑھیں: پاک افغان سرحد پر ’جماعت الاحرار‘ کے ٹھکانوں پر حملہ
حملے میں مبینہ طور پر جماعت الاحرار کے ڈپٹی کمانڈر عادل باچا کا کیمپ، تربیتی کمپاؤنڈ اور 4 دیگر کیمپ تباہ کردیئے گئے تھے تاہم آزاد ذرائع نے ان دعووں کی تصدیق نہیں کی تھی۔
لائیو ٹی وی