'بھارت کی ایٹمی حملے میں پہل نہ کرنے کی ڈاکٹرائن جھوٹ'
اسلام آباد: پاکستانی دفتر خارجہ کے ترجمان نفیس زکریا کا کہنا ہے کہ افغانستان کو اپنے تحفظات سے آگاہ کرچکے ہیں اور دہشت گردی کے خدشات کے پیش نظر پاک افغان سرحد پر اپنی حدود کے اندر باڑ لگارہے ہیں۔
اسلام آباد میں ہفتہ وار بریفنگ میں دفتر خارجہ کے ترجمان نفیس زکریا کا کہنا تھا کہ مقبوضہ کشمیر میں بھارتی مظالم اورانسانی حقوق کی سنگین خلاف ورزیوں کا سلسلہ جاری ہے اوربھارتی فوج اپنے مظالم سے توجہ ہٹانے کے لیے آئے روزلائن آف کنٹرول پر سیز فائر کی خلاف کررہی ہے۔
انہوں نے کہا کہ ہماری فوج ایل او سی پر انتہائی ذمہ داری کا مظاہرہ کرتی ہے اور ہم ہر واقعے کی رپورٹ اقوام متحدہ کے مبصر مشن کو بھیجتے ہیں۔
یہ بھی پڑھیں: ہندوستان کا مسئلہ کشمیر پر مذاکرات سے انکار
انہوں نے مطالبہ کیا کہ عالمی برادری کو چاہیے کہ وہ بھارت کی جانب سے مقبوضہ کشمیر میں ہونے والے مظالم اور ایل او سی کی خلاف ورزیوں کا نوٹس لے۔
نفیس زکریا کا کہنا تھا کہ اس سلسلے میں پاکستانی میڈیا نے بھی اہم کردار ادا کرتے ہوئے دنیا کے سامنے بھارتی مظالم کو آشکار کیا جس کو سراہتے ہیں جبکہ مقبوضہ کشمیر کی سول سوسائٹی کو بھی خراج تحسین پیش کرتے ہیں۔
انہوں نے کہا کہ بھارت کے جنگی عزائم خطے کی سلامتی کے لیے خطرناک ہیں، بھارت کی ایٹمی ہتھیاروں کےاستعمال میں پہل نہ کرنے کی ڈاکٹرائن جھوٹ پر مبنی ہے۔
ترجمان دفتر خارجہ نے کہا کہ پاکستان نے ہمیشہ ایٹمی ہتھیاروں کے استعمال میں پہل نہ کرنے کی بات کیوں کہ ایٹمی ہتھیاروں کےاستعمال میں پہل کرنے کے خوفناک نتائج ہوسکتے ہیں جبکہ پاکستان کی تجویز کردہ اسٹریٹیجک ریسٹرین ریجیم ایٹمی تصادم سےبچنے کی بہترین حکمت عملی ہے۔
مزید پڑھیں: اب معاملہ روایتی ہتھیاروں تک محدودنہیں رہےگا
انہوں نے کہا کہ پاکستان کی خارجہ پالیسی باہمی اعتماد اور مفاد پر مبنی ہے ہم ہمسایہ ممالک سمیت پوری دنیا کے ساتھ دوستانہ تعلقات چاہتے ہیں اور بالخصوص افغانستان میں ہر قسم کی پراکسی وارکی پرزور مذمت اور مخالفت کرتے ہیں۔
ان کا مزید کہنا تھا کہ دہشت گردی کے خدشات کے پیش نظر پاک افغان بارڈر پر اپنی سرحد کے اندر باڑ لگارہے ہیں، باڑ لگانے کی وجہ واضح ہے، ہم افغانستان کو اپنے تحفظات سے آگاہ کرچکے ہیں، تجارت اور دیگر قانونی مقاصد کے لیے ویزہ رکھنے والے افغان شہریوں کو پاکستان آنے کی اجازت ہے اور گزشتہ ہفتے بھی افغانستان سمیت دیگر ممالک کے سیاسی و تجارتی وفود نے پاکستان کو دورہ کیا۔
ترجمان دفتر خارجہ کا کہنا تھا کہ افغانستان میں موجود پاکستانیوں کو ویزہ کی توسیع کے حوالے سے مشکلات کا سامنا ہے ہم ان مسائل سے پوری طرح آگاہ ہیں اور افغان حکام سے رابطے میں ہیں۔
ترجمان کا یہ بھی کہنا تھا کہ اسلامی فوجی اتحاد کسی ایک ملک کے لیے یا ایک ملک کے خلاف نہیں بلکہ دہشت گردی کے خلاف ہے۔ انہوں نے مزید کہا کہ پارہ چنار اور لاہور میں ہونے والے دہشت گرد حملوں کی مذمت اور دونوں سانحات میں شہید ہونے والے افراد کے اہل خانہ کے ساتھ اظہار یکجہتی کرتے ہیں۔
لائیو ٹی وی