ڈیرہ غازی خان: پولیس مقابلے میں 5 مبینہ دہشت گرد ہلاک
ڈیرہ غازی خان: پنجاب پولیس کے محکمہ انسداد دہشت گردی (سی ٹی ڈی) سے مقابلے میں 5 مبینہ دہشت گرد ہلاک ہوگئے، جب کہ مقابلے کے بعد 8 مبینہ دہشت گرد فرار بھی ہوئے۔
سی ٹی ڈی کے ترجمان کے مطابق ملتان سے بھیجی گئی ایک ٹیم نے ڈیرہ غازی خان (ڈی آئی خان) کے علاقے موزہ راکھ روجھانی کے چوٹی بالا روڈ پر دہشت گردوں کی موجودگی کی خفیہ اطلاع پر ہفتہ اور اتوار کی درمیانی شب رات 3 بجے چھاپہ مارا گیا۔
سی ٹی ڈی حکام نے دہشت گردوں سے ہتھیار ڈالنے کا مطالبہ کیا تو دہشت گردوں نے اہلکاروں پر فائرنگ شروع کردی۔
سی ٹی ڈی اہلکاروں اور دہشت گردوں کے درمیان فائرنگ کا تبادلہ کافی دیر جاری رہا، مقابلے میں 5 دہشت گرد ہلاک ہوئے، مقابلے کے دوران تاریکی کا فائدہ اٹھاتے ہوئے 8 دہشت گرد فرار بھی ہوئے۔
سی ٹی ڈی کے مطابق مقابلے میں ہلاک ہونے والے 2 دہشت گردوں کی شناخت کچھ دن قبل اپنے ساتھیوں کی مدد سے پولیس تحویل سے فرار ہونے والے ملک تحسین اور محمد کامران کے نام سے ہوئی جب کہ باقی ہلاک ہونے والے تین دہشت گردوں کی فوری طور پر شناخت نہیں ہوسکی۔
یہ بھی پڑھیں: پنجاب:کالعدم تنظیموں کےخلاف فوجی آپریشن شروع
پولیس کے مطابق رات کی تاریکی کا فائدہ اٹھاکر کچھ دہشت گرد فرار ہونے میں کامیاب بھی ہوئے۔
سی ٹی ڈی کا کہنا تھا کہ گرفتار دہشت گردوں سے 4 ہینڈ گرنیڈ، 4 رائفل، 2 نائن ایم ایم پستول سمیت گولہ بارود بھی برآمد کیا گیا۔
محکمہ انسداد دہشت گردی کے ترجمان کا کہنا ہے کہ دہشت گردوں کی گرفتاری اور ملنے والے اسلحہ بارود سے متعلق تحقیقات کا آغاز کردیا گیا ہے۔
خیال رہے کہ گزشتہ ہفتے بھی سی ٹی ڈی پولیس نے پنجاب کے ضلع شیخوپورہ میں خفیہ معلومات پر کارروائی کرکے کالعدم تنظیم لشکر جھنگوی اور ٹی ٹی پی کے دہشت گردوں کو ہلاک کرنے کا دعویٰ کیا تھا۔
اس سے قبل گزشتہ ماہ 14 نومبر کو سی ٹی ڈی پولیس نے پنجاب کے ضلع گوجرانوالہ میں کارروائی کرکے 3 دہشت گردوں کو گرفتار کیا تھا، جب کہ 2 نومبر کو پنجاب کے ضلع شیخوپورہ میں سی ٹی ڈی پولیس نے ایک مقابلے میں بھی 9 دہشت گردوں کو ہلاک کیا تھا۔
سی ٹی ڈی پولیس نے رواں برس 29 اکتوبر کو بھی پنجاب کے ضلع گوجرانوالہ میں مقابلے کے دوران 5 دہشت گردوں کو ہلاک کرنے کا دعویٰ کیا تھا۔
لائیو ٹی وی