دورہ آسٹریلیا کیلئے 16رکنی ٹیسٹ اسکواڈ برقرار
پاکستان کرکٹ ٹیم کے چیف سلیکٹر انضمام الحق نے دورہ آسٹریلیا کیلئے پاکستان کے 16 رکنی اسکواڈ کا اعلان کردیا ہے جہاں نیوزی لینڈ میں ناقص بیٹنگ کے باوجود ٹیسٹ اسکواڈ کو برقرار رکھا گیا ہے۔
چیف سلیکٹر انضمام الحق نے سلیکشن کمیٹی کے بقیہ تین اراکین، ہیڈ کوچ مکی آرتھر اور کپتان مصباح الحق سے مشاورت کے بعد اسکواڈ کو برقرار رکھنے کا فیصلہ کیا۔
یاد رہے کہ نیوزی لینڈ کے دورے پر موجود پاکستانی ٹیم کو بیٹنگ لائن میں شدید مشکلات کا سامنا ہے اور بیٹنگ لائن کی ناقص کارکردگی کے باوجود مصباح الحق کی زیر قیادت ٹیسٹ اسکواڈ کو برقرار رکھا گیا ہے۔
قائد اعظم ٹرافی میں بہترین بیٹنگ کا مظاہرہ کرنے کے باوجود کامران اکمل سلیکٹرز کا اعتماد جیتنے میں ناکام رہے۔
پاکستانی ٹیم نیوزی لینڈ سے براہ راست آسٹریلیا پہنچے گی جہاں تین ٹیسٹ میچوں کی سیریز کا پہلا میچ برسبین میں 15 سے 19 دسمبر تک کھیلا جائے گا جو ڈے نائٹ ٹیسٹ ہو گا۔
اس کے بعد دونوں ٹیمیں 26 دسمبر سے باکسنگ ڈے ٹیسٹ کیلئے میلبرن میں آمنے سامنے ہوں گی جبکہ سیریز کا تیسرا اور آخری ٹیسٹ میچ سڈنی میں تین جنوری سے کھیل جائے گا۔
دورہ آسٹریلیا کیلئے 16 رکنی اسکواڈ ان کھلاڑیوں پر مشتمل ہے۔
مصباح الحق(کپتان)، شرجیل خان، سمیع اسلم، اظہر علی، یونس خان، بابر اعظم، اسد شفیق، محمد رضوان، سرفراز احمد، یاسر شاہ، وہاب ریاض، راحت علی، عمران خان جونیئر، محمد عامر، سہیل خان اور محمد نواز۔
لائیو ٹی وی