شہباز شریف کی سانحہ واہگہ کے زخمیوں کی عیادت
لاہور: وزیراعلیٰ پنجاب شہباز شریف سانحہ واہگہ کے زخمیوں کی عیادت کرنے جنرل ہسپتال پہنچے۔ اس موقع پر انہوں نے زخمیوں کے لواحقین سے بھی ملاقات کی۔
وزیراعلیٰ نے ہسپتال کی انتظامیہ کو ہدایت کی کہ زخمیوں کو بہترین طبی امداد فراہم کی جائے۔
اس موقع پر انہوں نے میڈیا کے نمائندوں سے بات کرتے ہوئے کہا کہ معصوم لوگوں کو ناحق قتل کرنے والے کسی رعایت کےمستحق نہیں۔
انہوں نے کہا کہ سانحہ واہگہ بارڈر کی جتنی بھی مذمت کی جائے کم ہے۔
گھرکی ہسپتال کے ایم ایس ڈاکٹر جاوید کا کہنا تھا کہ اس اسپتال میں سانحہ واہگہ کے 23 زخمی زیر علاج ہیں، جن میں سے سات مرد، آٹھ خواتین اور تین بچے شامل ہیں۔
انہوں نے کہا کہ ہسپتال انتظامیہ مریضوں کے علاج کے لیے ہرممکن سہولیات فراہم کررہی ہے۔
ڈاکٹر جاوید نے کہا کہ زخمی افراد کے زخم مختلف نوعیت کے ہیں۔
دوسری جانب سانحہ واہگہ میں جاں بحق ہونے والے نوافراد کی نمازجنازہ لاہور میں جماعۃ الدعوۃ کے مرکز القدسیہ میں ادا کردی گئی۔
ہلاک شدگان میں سے چھ کا تعلق کراچی اور تین کا پشاور سے تھا۔
نماز جنازہ کے بعد ان کی میتیں ہوائی جہاز کے ذریعے آبائی شہروں کو روانہ کردی گئیں۔
اب تک 34 میتیں ورثاء کے حوالے کردی گئی ہیں ۔
لائیو ٹی وی