آرمی چیف کراچی میں ظلم کا نوٹس لیں، الطاف حسین
کراچی: متحدہ قومی موومنٹ (ایم کیو ایم) کے قائد الطاف حسین نے آرمی چیف جنرل راحیل شریف اور انٹر سروسز انٹیلیجنس کے سربراہ لیفٹننٹ جنرل ظہر الاسلام سے کراچی میں ظلم و زیادتی کا نوٹس لینے کی اپیل کی ہے۔
ڈان نیوز کے مطابق اتوار کے روز ایم کیوایم کے مرکز نائن زیروعزیزآباد میں ہنگامی پریس کانفرنس سے ٹیلی فونک خطاب کرتے ہوئے الطاف حسین نے کہا کہ ایم کیوایم کے بے گناہ کارکنان وعوام کو ریاستی مظالم کا نشانہ بنانے کا نوٹس لیا جائے اور مہاجروں کے خلاف ظلم وستم کا سلسلہ بند کرایا جائے۔
الطاف حسین نے نیوز کانفرنس کے دوران وفاقی وزیر داخلہ چوہدری نثار کو کراچی آپریشن شروع ہونے سے پہلے مانیٹرنگ کمیٹی کا وعدہ بھی یاد دلایا اور کہا کہ کمیٹی بننے کی صورت میں حالات مختلف ہوتے۔
انہوں نے کہا کہ چوہدری نثار سے پوچھا جائے کہ ماروائے عدالت قتل کیسے ہو رہے ہیں۔
انہوں نے کہا کہ آپریشن کے نام پر ظلم کیا جا رہا ہے،کراچی میں آپریشن کا کہہ کر سکھر تک ایم کیوایم کے کارکنوں کے نام اور پتے نوٹ کیے گئے۔
الطاف حسین نے یاد دلایا کہ انہوں نے ہی آصف علی زرداری کو صدر مملکت بنانے کی تجویز اور سندھ میں دیہی و شہری کی تفریق مٹانے کی کوشش کی۔
الطاف حسین نے گلہ کیا کہ حالیہ دنوں میں انہوں نے کئی بار بلاول ہاؤس فون کیا لیکن سابق صدر نے انہیں جوابی فون نہیں کیا۔
الطاف حسین نے نیوز کانفرنس کے دوران انیس سو بانوے کے آپریشن پر بھی تفصیل سے روشنی ڈالی اور یاد دلایا کہ اس وقت سندھ اور مرکز میں نواز شریف کی حکومت تھی۔
لائیو ٹی وی
تبصرے (1) بند ہیں