کراچی: پاکستان کے سب سے بڑے شہر کراچی میں گزشتہ روز جمعرات کو ہونے والے ایک طاقتور دھماکے میں ہلاک ہونے والے ایس ایس پی سی آئی ڈی پولیس چوہدری محمد اسلم خان کی نمازِ جنازہ ادا کردی گئی ۔

چوہدری اسلم اور ان کے ساتھیوں کی نمازِ جنازہ میں اعلیٰ سول اور فوجی شخصیات شریک ہوئیں۔ اس موقع پر سندھ پولیس کے ایک دستے نے اپنے بہادر افسر کو سلامی پیش کی۔

ان کی تدفین کی موقع پر عزیز بھٹی تھانے کی حدود میں سخت حفاظتی انتظامات کئے گئے تھے۔ نمازِ جنازہ میں وزیرِ اعلیٰ سندھ سید قائم علی شاہ، کورکمانڈر کراچی لیفٹننٹ جنرل محمد اعجاز چوہدری، صوبائی وزیر شرجیل انعام میمن اور پولیس کے دیگر اعلیٰ حکام موجود تھے۔ دوسری جانب پولیس نے اس واقعے کی تفصلی رپورٹ بھی تیار کرلی ہے جبکہ چوہدری اسلم کی پوسٹ مارٹم رپورٹ بھی تیار کرلی گئی ہے۔

اس دھماکے میں چوہدری اسلم سمیت تین پولیس ہلکار ہلاک اور گیارہ زخمی ہوگئے تھے۔

شہر کے گنجان آباد علاقے حسن اسکوائر کے قریب لیاری بائی پاس پر ہوئے دھماکے میں ان کے ڈرائیور کامران اور ایک دیگر ساتھی بھی مارے گئے ہیں۔

یاد رہے کہ اس واقعہ سے چند گھنٹوں قبل ہی چوہدری اسلم کی قیادت میں سی آئی ڈی کی ٹیم نے کارروائی کرتے ہوئے تین مشتبہ افراد کو ہلاک کیا، جو ان کی آخری کارروائی ثابت ہوئی۔

سینئر پولیس افسر اقبال محمود نے چوہدری اسلم کی ہلاکت کی تصدیق کرتے ہوئے کہا کہ واقعہ عیسیٰ نگری کے قریب تقریبا چار بج کر چالیس منٹ پر پیش آیا۔

انہوں نے خبر رساں ادارے اے ایف پی کو بتایا کہ خودکش بمبار نے ایس پی سی آئی ڈی کے قافلے پر حملہ کیا جس میں وہ ہلاک ہوگئے۔

واقعے میں چوہدری اسلم کی گاڑی مکمل طور پر تباہ ہوگئی جبکہ پولیس نے علاقے کو گھیرے میں لے لیا اور تفتیش شروع کردی۔

چوہدری اسلم نے سنگین جرائم میں ملوث کئی گروہوں اور مجرموں کا خاتمہ کیا۔ وہ لشکرِ جھنگوی اور تحریکِ طالبان پاکستان ( ٹی ٹی پی ) کی ہٹ لسٹ پر تھے۔

دھماکہ اتنا شدید تھا کہ اس کی گونج دور دور تک سنی گئی۔ اس کی شدت سے آس پاس کی عمارتوں کے شیشے بھی ٹوٹ گئے۔

دھماکہ اس وقت ہوا جب چوہدری اسلم کی گاڑی لیاری ایکسپریس وے کی جانب جارہی تھی۔

واقعے کے بعد بم ڈسپوزل اسکواڈ اور دیگر تفتیشی اداروں نے جائے وقوعہ پر پہن کر تفتیش شروع کردی تھی۔

چوہدری اسلم کی ہلاکت کے بعد ملک کی اہم شخصیات نے افسوس اور تعزیت کا اظہار کیا ہے۔

کراچی بم دھماکے میں چوہدری اسلم کی ہلاکت کی وزیراعظم میاں محمد نواز شریف سمیت صدر اور دیگر اعلیٰ حکام نے سخت الفاظ میں مذمت کی۔

وزیراعظم نے اپنے ایک پیغام نے کہا کہ چوہدری اسلم ایک بہادر پولیس افسر تھے اور دہشت گردوں کے خلاف جنگ میں قوم کے عزائم کو کم نہیں کیا جاسکتا۔

طالبان نے ذمہ داری قبول کرلی۔

ادھر تحریک طالبان پاکستان مہمند ایجنسی نے حملے کی ذمہ داری قبول کرلی ہے۔

گروپ کے ترجمان سجاد مہمند نے کہا کہ اسلم ٹی ٹی پی کے خلاف آپریشنز میں ملوث تھے جسکی وجہ سے انہیں نشانہ بنایا گیا۔

انہوں نے کہا 'چوہدری اسلم نے طالبان قیدیوں کو سی آئی ڈی سیل میں ہلاک کیا اور وہ ہماری ہٹ لسٹ پر تھے۔'

چوہدری اسلم کو ماضی میں پاکستانی طالبان کی جانب سے متعدد دھمکیاں موصول ہوچکی تھیں جبکہ ستمبر 2011ء میں ان کی رہائشگاہ کے باہر ایک زوردار دھماکہ ہوا تھا تاہم وہ اس میں محفوظ رہے تھے۔

حملے کے بعد دہشت گردوں کے خلاف کارروائی جاری رکھنے کے عزم کا اظہار کرتے ہوئے انہوں نے کہا 'میں اپنی جان دے سکتا ہوں تاہم دہشت گردوں کے آگے کبھی نہیں جھکوں گا۔'

جمعرات کی صبح چوہدری اسلم نے دعویٰ کیا تھا کہ ایک کارروائی کے دوران پاکستانی طالبان کے تین کارندوں کو ہلاک کردیا گیا ہے۔

کراچی میں ان دنوں جرائم پیشہ عناصر، ٹارگٹ کلرز، دہشت گردوں اور دیگر کے خلاف آپریشن جاری ہے۔

ایک کروڑ 80 لاکھ سے زائد افراد پر مشتمل کراچی شہر پاکستان کی معیشت میں ریڑھ کی ہڈی کی حیثیت رکھتا ہے جبکہ ملکی جی ڈی پی کا 42 فیصد اسی شہر سے پیدا ہوتا ہے۔

تاہم کئی سالوں سے جاری اغوا برائے تاوان، قتل اور لسانی، فرقہ وارانہ اور سیاسی تشدد کی وجہ سے شہر کی سرگرمیاں متاثر ہوئی ہیں۔