حیدر آباد: متحدہ قومی موومنٹ (ایم کیو ایم) کے قائد الطاف حسین نے کہا ہے کہ سندھ میں اردو بولنے والوں کے ساتھ سوتیلی ماں جیسا سلوک کیا جا رہا ہے اور اگر ہمارے مطالبات نہیں ماننے جاتے تو اردو بولنے والوں کے لیے الگ صوبہ بنایا جائے۔

ڈان نیوز کے مطابق جمعہ کو حیدرآباد میں بلدیاتی انتخابات کے حوالے سے جلسے میں خطاب کرتے ہوئے الطاف حسین نے کہا کہ سندھ میں سندھی اور اردو بولنے والوں کو برابری کے حقوق دیئے جائیں۔

انہوں نے خبر دار کیا کہ اگر سندھ میں اردو بولنے والوں کے لئے علیحدہ صوبے کا مطالبہ پورا نہیں کیا گیا تو آگے چل کر بات ملک تک بھی پہنچ سکتی ہے۔

گزشتہ وفاقی اور صوبائی حکومت میں حکمران پاکستان پیپلز پارٹی کی اتحادی جماعت کے سربراہ نے کہا کہ جمہوری حکومتوں نے کبھی بلدیاتی الیکشن نہیں کرائے اور ہمیشہ راہ فراراختیارکیا۔

انہوں نے کہا کہ پپلز پارٹی نے سندھ میں بلدیاتی انتخابات سے بچنےکے لئے حلقہ بندیوں کا شوشہ چھوڑا۔

انہوں نے دعویٰ کیا کہ اگراقوام متحدہ کے زیراہتمام مردم شماری کرائی جائے تو شہری علاقوں کی آبادی دیہی علاقوں سے زیادہ ہوگی۔

بلاول بھٹو کے ٹویٹ ''مر جائیں گے لیکن سندھ نہیں دیں گے'' کے جواب میں الطاف حیسن نے کہا 'بلاول تم میرے بھتیجے ہو اور، بھتیجے جیسا رویہ ہی اختیار کرو'۔

انہوں نے کہا کہ پیپلز پارٹی، بلاول اور آصف زرداری میز پر بیٹھ کر بات کریں، کیونکہ یہ عمل آج نہیں تو کل کرنا پڑے گا۔