مکہ، سعودی عرب: جمعرات کو مسجد الحرام کا ایک نوتعمیر شدہ ڈھانچہ اچانک منہدم ہوگیا، چنانچہ مطاف توسیعی منصوبے کے دوسرے مرحلے کا کام تاخیر کا شکار ہوگیا ہے۔ تاہم عمرہ گیٹ کے جنوب میں ہونے والے اس حادثے میں کوئی شخص زخمی نہیں ہوا۔

عرب نیوز کی رپورٹ کے مطابق حرمین شریفین کے ترجمان احمد المنصوری نے کہا کہ ”اس ڈھانچے کے گرنے کی وجہ سے چبوترے پر ملبے کی کافی مقدار جمع ہوگئی ہے۔ چونکہ یہ حصہ مطاف سے فاصلے پر ہے ہے، چنانچہ اس واقعہ میں کوئی ہلاک یا زخمی نہیں ہوا ۔“

خادم الحرمین الشریفین شاہ عبداللہ نے حکام کو ہدایت کی ہے کہ مطاف کے توسیعی منصوبے کا پہلا مرحلہ مکمل کرکے حج سے پہلے کھول دیا جائے۔ نئے حصے میں پہلی اور دوسری منزل کی توسیع کی گئی ہے، جس کی کل گنجائش چالیس ہزار عازمین فی گھنٹہ تک ہے۔

شاہ عبداللہ کے حکم سے حرمین کی یہ حالیہ توسیع تاریخ میں سب سے بڑی توسیع ہے، اور 13 لاکھ عازمین کے لیے اضافی گنجائش فراہم کرتی ہے۔مسجد سے ملحقہ نئے اضافی حصے میں 52 گیٹ، چار میناراور 120 متحرک زینے ہیں۔ یہ منصوبہ ایک لاکھ مربع میٹر سے زیادہ بڑے حصے پر محیط ہے۔