اسرائیل کی غزہ میں جارحیت بدستور جاری ہے جہاں غزہ کے ایک اور پناہ گزین کیمپ پر اسرائیلی فوج نے حملہ کردیا جس کے نتیجے میں 21 افراد شہید ہوگئے، تاہم اسرائیل نے اس حملے کی تردید کردی ہے۔

خبر رساں ادارے ’اے ایف پی‘ کے مطابق حماس کے زیر انتظام غزہ میں شہری دفاع کے ایک اہلکار نے بتایا کہ منگل کو رفح کے مغرب میں ایک بے گھر افراد کے کیمپ پر اسرائیلی حملے میں کم از کم 21 افراد شہید ہوگئے۔

واضح رہے کہ اتوار کو اسی طرح کے پناہ گزین کیمپ پر اسرائیلی جارحیت کے نتیجے میں 45 افراد شہید ہوگئے تھے۔

تاہم اسرائیل نے تازہ ترین رپورٹ کردہ حملے کی تردید کی ہے۔

مزید کے لیے کلک کریں

حماس کے خلاف جنگ میں شہریوں کی شہادتوں پر بڑھتے ہوئے عالمی خدشات کے باوجود اسرائیل نے اپنی پالیسی بدلنے کے کوئی آثار نہیں دکھائے ہیں اور جنگ بندی کو یقینی بنانے کے لیے بین الاقوامی بھی کوششیں تعطل کا شکار ہیں۔

غزہ کی شہری دفاعی ایجنسی کے اہلکار محمد المغائر نے کہا کہ مغربی رفح میں بے گھر لوگوں کے خیموں کو نشانہ بنانے والے حملے میں 21 افراد مارے گئے، حماس نے کہا کہ علاقے پر اسرائیلی حملے کے نتیجے میں درجنوں شہید اور زخمی ہوگئے ہیں۔

اسرائیل کی فوج نے ان الزامات کو مسترد کرتے ہوئے کہا کہ اس نے المواسی میں انسانی ہمدردی کے لیے مقرر کردہ علاقے پر حملہ نہیں کیا۔

رفح کے رہائشیوں اور ایک فلسطینی سیکیورٹی ذرائع نے بتایا کہ اسرائیلی ٹینک اب جنوبی شہر کے قلب میں گھس چکے ہیں۔

ایک رہائشی عبدالخطیب نے کہا کہ لوگ اس وقت اپنے گھروں کے اندر محصور ہیں کیونکہ جو بھی حرکت کرتا ہے اسے اسرائیلی ڈرون اسے گولی مار دیتے ہیں۔

اس کے علاوہ غزہ میں صہیونی فوج نے خان یونس پر حملہ کر کے 3 فلسطینیوں کو شہید کردیا، غزہ کے جنوب میں واقع خان یونس میں اسرائیلی حملے میں شہید ہونے والے تین افراد میں 2 بچے بھی شامل ہیں۔

الجزیرہ کے مطابق اس کے علاوہ شمالی غزہ کے علاقے شیخ رضوان میں شطات خاندان کے گھر پر اسرائیلی فضائی حملے کے بعد شہادتوں اور لوگوں کے زخمی ہونے کی بھی اطلاع ہے۔

وفا خبر رساں ایجنسی نے وسطی غزہ میں نصرت پناہ گزین کیمپ کے شمال میں ایک گھر اور غزہ شہر کے صابرہ محلے میں ایک گھر پر حملے میں متعدد افراد کے زخمی ہونے کی بھی اطلاع دی ہے۔

جنوبی رفح میں اسرائیلی ٹینک اب شہر کے یبنا اور شبورہ پناہ گزین کیمپوں کے مرکز میں تعینات ہیں، وفا کے مطابق، مقامی ذرائع نے رپورٹ کیا ہے کہ اسرائیلی طیارے بمباری کر رہے ہیں جب کہ بکتر بند گاڑیاں شہر کے وسط اور مغرب میں گھروں پر بھاری مشین گنوں سے حملہ کر رہی ہیں۔