لاہور ہائی کورٹ نے رہنما پاکستان تحریک انصاف (پی ٹی آئی) فرخ حبیب کی درخواست منظور کرتے ہوئے وزارت داخلہ کو ان کا نام ایگزٹ کنٹرول لسٹ (ای سی ایل) سے نکالنے کا حکم دے دیا۔

ڈان اخبار کی رپورٹ کے مطابق جسٹس محمد انوارالحق پنوں نے فرخ حبیب کی درخواست پر سماعت کے بعد محفوظ کیا گیا فیصلہ سنایا۔

سابق وزیر مملکت فرخ حبیب کے وکیل نے مؤقف اختیار کیا کہ درخواست گزار بیرون ملک جانا چاہتے ہیں لیکن مدعا علیہ نے ان کا نام غیر قانونی طور پر ای سی ایل میں ڈال دیا۔

انہوں نے کہا کہ وفاقی حکومت کا یہ اقدام سیاسی انتقام کی ایک روشن مثال ہے کیونکہ فرخ حبیب کسی کیس میں مطلوب نہیں ہیں، وہ قانون کی پاسداری کرنے والے شہری اور سابق وزیر مملکت ہیں۔

مزید کے لیے کلک کریں

وکیل نے عدالت سے استدعا کی کہ درخواست گزار کا نام ای سی ایل سے نکال کر بیرون ملک جانے کی اجازت دی جائے۔

مذکورہ درخواست وزارت داخلہ اور وفاقی تحقیقاتی ایجنسی (ایف آئی اے) کے خلاف دائر کی گئی تھی۔