پاکستان سپر لیگ (پی ایس ایل) سیزن 3 کا 16 واں میچ آج دفاعی چمپئن پشاور زلمی اور ملتان سلطان کے درمیان کھیلا جائے گا۔

دبئی کے کرکٹ اسٹیڈیم میں کھیلے جانے والے اس میچ کا آغاز پاکستانی وقت کے مطابق رات 9 بجے ہوگا۔

اس سے قبل پی ایس ایل سیزن 3 کے افتتاحی میچ میں ملتان سلطان کے پشاور زلمی کو 7 وکٹوں سے شکست دی تھی۔

مزید پڑھیں: عمران طاہر پی ایس ایل میں ہیٹ ٹرک کرنے والے پہلے غیر ملکی

دونوں ٹیموں کی بات کی جائے تو پوائنٹ ٹیبل پر 7 پوائنٹس کے ساتھ سرفہرست ملتان سلطان نے اب تک 5 میچز کھیلے ہیں، جس میں سے 3 میں اسے فتح اور ایک میں شکست کا سامنا کرنا پڑا جبکہ ایک میچ بارش کی نذر ہوگیا تھا۔

پشاور زلمی کی بات کی جائے تو 6 پوائنٹس کے ساتھ وہ تیسرے نمبر پر ہے اور اسے 5 میچز میں سے 3 میں کامیابی جبکہ 2 میں شکست ہوئی۔

یہ بھی پڑھیں: سیمی خان! کپتان ہو تو تم جیسا

دونوں ٹیموں کی کارکردگی اور کھلاڑیوں پر نظر ڈالی جائے تو ملتان سلطان کی ٹیم نے ایونٹ میں اپنی حیران کن کارکردگی سے سب کی توجہ اپنی جانب مبذول کرالی ہے اور ٹیم کو کپتان شعیب ملک، کمار سنگارا، احمد شہزاد، ڈیرن براوو، عمران طاہر اور عمر گل جیسے مایہ ناز کھلاڑیوں کی خدمات حاصل ہیں۔

پشاور زلمی کی ٹیم پر نظر ڈالی جائے تو کپتان ڈیرن سیمی ٹیم کی قیادت میں ٹیم کا مورال کافی بلند ہے اور ٹیم کامیابی کے لیے پر امید ہے جبکہ انہیں کامران اکمل، تمیم اقبال، رکی ویسلز، وہاب ریاض جیسے کھلاڑیوں کی خدمات حاصل ہیں۔