ریاض: سعودی پریس ایجنسی کی رپورٹ کے مطابق سعودی عرب کے مشرقی علاقے ہوئے دہشت گردوں کے حملے کی تفتیش کے دوران سیکورٹی فورسز سے مقابلے میں دو مشتبہ دہشت گرد اور دو سیکورٹی افسران ہلاک ہوگئے۔

روزنامہ سعودی گزٹ کی رپورٹ کے مطابق سعودی عرب کے صوبے بریدہ میں مشتبہ دہشت گردوں اور قانون نافذ کرنے والے اداروں کے اہلکاروں کے درمیان ہونے والے مقابلے میں دو دہشت گرد سمیت دو سیکیورٹی اہلکار ہلاک ہوگئے۔

سعودی وزارت داخلہ کے ترجمان میجر جنرل منصور الترکی نے ایک بیان میں تصدیق کرتے ہوئے بتایا ہے کہ منگل کے روز صوبہ الاحساء کے الدالوہ قصبے میں شیعہ امام بارگاہ پر حملے پر نامعلوم مسلح نقاب پوشوں کی فائرنگ سے سات افراد کی ہلاک ہوگئے تھے، جس کے بعد سیکورٹی حکام نے بڑے پیمانے پر تفتیش کا آغاز کیا تھا۔

اسی سلسلے میں منگل ہی کے روز ایک کارروائی میں 6 افراد کو الدالوہ کے سانحے میں ملوث ہونے کے الزام میں حراست میں لیا گیا تھا۔

العربیہ ڈاٹ نیٹ کی رپورٹ کے مطابق تفتیش کے دوران حاصل ہونے والی معلومات کی روشنی میں سیکیورٹی اداروں نے مشتبہ افراد کی گرفتاری کے لیے بریدہ شہر کی المعلمین کالونی کے ایک مکان پر چھاپہ مارا۔

چھاپے کی اطلاع ملتے ہی مشتبہ افراد نے خود کو مکان کے اندر مورچہ زن کر لیا اور سیکیورٹی اہلکاروں پر اندھا دھند فائرنگ شروع کر دی۔

سیکیورٹی اداروں کی جوابی کارروائی میں دو دہشت گرد مارے گئے جبکہ ان کی فائرنگ سے دو سیکیورٹی اہلکار بھی ہلاک ہوئے۔

اس کارروائی کے دوران زخمی ہونے والے اہلکاروں کو ہسپتال منتقل کردیا گیا ہے۔

سعودی عرب کے سیکیورٹی ترجمان کا کہنا ہے کہ الاحساء فائرنگ کے سلسلے میں ملک کے مختلف حصوں میں کی جانے والی کارروائیوں میں اب تک چھ شہروں سے پندرہ مشتبہ افراد کو حراست میں لیا جا چکا ہے۔

ان میں چار بریدہ، دو البدائع جبکہ الاحساء، شقراء اور ریاض سے ایک ایک شخص کو حراست میں لیا گیا ہے۔ منگل کو الاحساء کے علاقے میں ایک چھاپے کے دوران چھ افراد کو گرفتار کیا گیا تھا۔