سیاسی کشیدگی پر پی پی پی کی 11 رکنی کمیٹی
کراچی: ملک میں جاری سیاسی کشیدگی ختم کرنے کی خاطر سیاسی جماعتوں سے رابطہ کے لیئے پاکستان پیپلز پارٹی (پی پی پی) نے 11 رکنی خصوصی کمیٹی تشکیل دے دی۔
پی پی پی کے پولیٹیکل سیکرٹری کی طرف سے جاری کردہ نوٹیفکیشن کے مطابق خصوصی کمیٹی سینیٹر رحمان ملک، ایم این اے میڈم فریال تالپور، سینیٹر مولا بخش چانڈیو، رکن سندھ اسمبلی نثار کھوڑو، سابق اراکین قومی اسمبلی امتیاز صفدر وڑائچ،جاوید وڑائچ اور افضل ندیم چن خیبر پختونخوا کے صوبائی صدر سابق رکن قومی اسمبلی خانزادہ خان، سابق ڈپٹی اسپیکر قومی اسمبلی فیصل کریم کنڈی، اور سینیٹر صابر بلوچ اور فتح محمد حسنی پر مشتمل ہو گی۔
سینیٹر رحمان ملک کو خصوصی کمیٹی کے کنوینر کے طور پر نامزد کیا گیا ہے۔
سابق صدر آصف علی زرداری نے کمیٹی کو ہدایات جاری کرتے ہوئے کہا ہے کہ کمیٹی اراکین فوری طور پر دیگر اتحادی جماعتوں سے رابطے کریں۔
اس موقع پر زرداری نے کمیٹی کو ہدایات جاری کرتے ہوئے کہا کہ کشیدگی کا ایسا حل نکالا جائے کہ جمہوریت پٹڑی سے نہ اترے۔
انہوں نے کہا کہ سیاسی کشیدگی کا حل نکالنے میں کمیٹی کردار ادا کرے۔