ہاکی ورلڈ کپ کا ایک اہم میچ ہندوستان اور اسپین کے درمیان دلچسپ مقابلے کے بعد ایک ایک سے برابر رہا جس کے بعد انڈیا سیمی فائنل کی دوڑ سے باہر ہوگیا۔

ہالینڈ میں جاری میگا ایونٹ میں جمعرات کو کھیلے گئے مینز ایونٹ کے اس میچ میں پہلا گول 28ویں منٹ میں ہندوستان کی جانب سے روپندر سنگھ نے پینلٹی اسٹروک پر کیا ۔

چھ منٹ بعد اسپین کی جانب سے روک اولیوا نے فیلڈ گول کرکے اسکور کو برابر کردیا۔

دونوں اطراف سے ایک دوسرے کی گول پوسٹ پر متعدد حملے کیے گئے تاہم کوئی بھی ٹیم گول اسکور کرنے میں ناکام رہی۔

دونوں ٹیموں کے گول کیپرز نے شاندار کھیل کا مظاہرہ کرتے ہوئے متعدد گول روکے۔

میچ کے بعد ہندوستان کوچ ٹیری والش کا کہنا تھا کہ میچ سے ایک پوائنٹ حاصل کرنا اچھا ہے تاہم ہم زیادہ اوپن کھیل کی امید کررہے تھے پر اسپین کے دفاع نے ایسا نہیں ہونے دیا۔

اسپین کے کپتان کا کہنا تھا کہ وہ میچ سے قبل ہندوستان کے کھیل کو گزشتہ دو میچوں سے قریب سے دیکھ رہے تھے اور اختتامی مراحل میں گول کرنے کی منصوبہ بندی کی گئی تھی تاہم ہمیں میچ کے درمیان میں ملنے والے موقعوں سے فائدہ اٹھانا چاہیئے تھا۔