حافظ آباد: کل تحصیل پنڈی بھٹیاں میں پنجاب اسمبلی کے حلقہ پی پی-107 میں ضمنی انتخاب کے سلسلے میں ووٹ ڈالے گئے۔

غیر حتمی اور غیرسرکاری نتیجے کے مطابق پاکستان تحریک انصاف کی امیدوار نگہت انتصار نے واضح برتری حاصل کرلی۔

ڈان نیوز ٹی وی کی رپورٹ کے مطابق اس ضمنی انتخاب میں پاکستان تحریک انصاف اور مسلم لیگ نون کے امیدواروں کے درمیان کانٹے کا مقابلہ ہوا۔ ابتدائی غیر حتمی اور غیرسرکاری نتائج کے مطابق پاکستان تحریک انصاف کی امیدوار نگہت انتصار بیالس ہزار سے زائد ووٹ لے کر سبقت لے گئیں۔ جبکہ مسلم لیگ نون کے امیدوار سرفراز بھٹی سینتیس ہزار ووٹ کے ساتھ دوسرے نمبر پر رہے۔

یاد رہے کہ یہ نشست ن لیگ کے شعیب شاہ کو دھاندلی کےالزام میں نااہل قرار دیے جانے کے بعد خالی ہوئی تھی۔

پولنگ کے دوران دونوں سیاسی جماعتوں کے کارکنان میں تصادم میں سات افراد زخمی ہوگئے۔ مبینہ طور پر تحریک انصاف کے کارکنوں نے نون لیگ کی پنجاب اسمبلی کی دو خواتین اراکین کے ساتھ بدتمیزی کی اور پولنگ اسٹیشن سے نکلنے پر مجبور کردیا۔