چیئرمین تحریک انصاف عمران خان۔ فائل فوٹو رائٹرز۔۔۔

لاہور: پاکستان تحریک انصاف (پی ٹی آئی) کے انٹرا پارٹی الیکشن کے دوران عمران خان کو بلا مقابلہ چیرمین اور شاہ محمود قریشی کو وائس چیرمین منتخب کرلیا گیا۔

لاہور میں چیرمین شپ کے انتخاب کے لیے کاغذات نامزدگی جمع کرانے کے بعد میڈیا سے گفتگو کرتے ہوئے عمران خان نے کہا کہ دو بار سے زیادہ پارٹی میں کوئی بھی شخص چیرمین نہیں بن سکے گا۔

انہوں نے کہا کہ جماعت اسلامی سے سیٹ ایڈجسٹمنٹ کےحوالے سے بات تئیس مارچ کے جلسے کے بعد ہوگی۔

عمران خان کے کاغذات نامزدگی جمع کروانے کے باوجود کوئی بھی دیگر امیدوار میدان میں نہ آسکا جس کے باعث انہیں بلا مقابلہ منتخب کرلیا گیا۔

تحریک انصاف کے چیف الیکشن کمشنر حامد خان کا کہنا ہے کہ جمعرات کو کل اڑتالیس عہدوں کے لیے انتخاب ہوگا۔

انہوں نے کہا کہ صدر کے عہدے کے لیے جاوید ہاشمی اور عمر سرفراز چیمہ مد مقابل ہوں گے۔