فائل فوٹو --.

میری ایک دوست نے جو اشرافیہ کے ایک اسکول میں پڑھاتی ہیں ایک مرتبہ اپنی ایک شاگرد کو میرے پاس بھیجا- اس نوجوان طالبہ کے مقالے کا موضوع "ہمارے علاقائی ہیرو" تھا اور اسے کچھ مدد درکار تھی- ایک نوجوان، پرجوش اور متجسس ذہن کی شخصیت سے ملاقات ہمیشہ میرے لئے ایک خوشگوار تجربہ ہوتی ہے اور یہ تو یقیناً اس سے بھی زیادہ بڑی بات تھی-

اس کا بھاری لہجہ اور جس تیزی سے وہ انگریزی بول رہی تھی میرے لئے اسکا ساتھ دینا اور اسکو سمجھنا مشکل ہورہا تھا- ایک فقرہ جو وہ بار بار دہرا رہی تھی اور جو میری سمجھ میں نہیں آرہاتھا "ڈولا باٹی"، پتہ نہیں کیا کہہ رہی ہے؟ میں پس و پیش میں تھا- لیکن جب اس نے بار بار یہ فقرہ دہرایا تو میں نے اس نئے لفظ کے حروف کا ایک ایک کر کے تجزیہ کرنا شروع کیا-

اوہ یہ تو نام ہے، ہماری تاریخ کا، پنجاب کے ایک ہیرو کا جسے ہم بھول چکے ہیں، اکبر اعظم کےعہد کا، سمجھ گیا! وہ دلا بھٹی کا نام لے رہی تھی، پنجاب کے عظیم باغی کا! اور اس کا تلفظ بالکل ویسا ہی تھا گویا کہ وہ نیو یارک سے آئی ہو اور میرے لئے جو پنجاب میں پلا بڑھا تھا اسکے تلفظ کو سمجھنا مشکل تھا.

میں نے کام مکمل کرنے میں اس لڑکی کی مدد کی لیکن اس سے کہیں زیادہ مدد تو اس لڑکی نے میری کی تھی، پنجابی سوسائٹی اور اس کی سیاست کو سمجھنے میں- اس پاکستانی لڑکی نے کسی باہر کے ملک میں تعلیم نہیں پائی تھی- اس نے یہ لہجہ اپنے ملک کے ایسےاسکول میں سیکھا تھا جہاں اشرافیہ کے بچے تعلیم پاتے ہیں-

جب ہماری دوستی ہو گئی تو مجھے پتا چلا کہ اس کے والد کسی مشہور اور مہنگے علاقے میں زیورات کا کاروبار کرتے ہیں- دراصل یہ لوگ سنار تھے اور پرانے لاہور میں رہتے تھے- بعد ازاں اس لڑکی کے والد نے اس نئے ابھرتے ہوئے شہر کے فیشن ایبل علاقے میں اپنا کاروبار منتقل کر دیا تھا تاکہ نئے مواقع سے فائدہ اٹھایا جا سکے اور اس وقت تک یہ لڑکی پیدا بھی نہیں ہوئی تھی- اس لڑکی کے ددھیال نے پرانے "محلے" میں اپنی زندگی کے ابتدائی ایام گزارے تھے، یہ لوگ ابھی حیات ہیں اور اپنے بچوں کے ساتھ رہتے ہیں-

ایک چھت تلے یہ لوگ تین زبانیں بولتے ہیں اور یہاں تین ثقافتیں ساتھ ساتھ چل رہی ہیں- اس لڑکی کے دادا دادی آپس میں اور دوسروں کے ساتھ لاہوری لہجہ میں پنجابی بولتے ہیں، وہ صرف یہی زبان جانتے ہیں-

البتّہ لڑکی کے والدین کو دو مواقع حاصل تھے- یا تو اردو بولیں یا پنجابی- وہ آپس میں تو پنجابی بولتے تھے لیکن بچوں کے ساتھ اردو میں بات کرتے تھے- اپنے دوستوں سے تو پنجابی میں بات کرتے تھے لیکن گاہکوں کے ساتھ اردو بولتے جس میں انگریزی کی بھی آمیزش ہوتی- وہ لاہوری پنجابی لہجے میں اردو بولتے تھے-

جہاں تک لڑکی کا تعلق ہے تو اس کے لئے انگریزی بولنا آسان تھا لیکن تھوڑی بہت کوشش سے اردو بول لیتی تھی اور اپنے دادا دادی کو خوش کرنے کیلئے اس نے پنجابی کے چند جملے بھی سیکھ لئے تھے- اس کے اردو کے لب و لہجہ میں غیر ملکی جھلک تھی اور پنجابی تو لگتا تھا کہ کسی اور ہی دنیا کی بول رہی ہے-

میں جلد ہی اس نتیجے پر پہنچا کہ یہ تقسیم محض زبان ہی تک محدود نہیں تھی- بلکہ اور باتوں میں بھی اس کا اظہار ہوتا تھا- دیسی گھی کی خوشبو سونگھ کر اس کے دادا دادی کی آنکھیں چمک اٹھتیں- ماں باپ کو بھی یہ خوشبو اچھی لگتی تھی لیکن وہ اسے چھپا جاتے اور زیتون کے تیل کو ترجیح دیتے جس میں کوئی خوشبو نہیں ہوتی اور جہاں تک لڑکی کا تعلق ہے تواس کے منہ سے"یخ" نکل جاتا اور الٹی کی ایکٹنگ کرنے لگتی-

میں نے کئی سبق سیکھے اور میں نے یہ محسوس کیا کہ اس تقسیم کا اظہار بہت سی شکلوں میں ہوتا ہے گو کہ وہ اتنے نقصان دہ یا تکلیف دہ نہیں ہیں-

لیکن میرے لئے اس سے زیادہ اہم ایک اور سوال تھا، آیا پنجابی متوسط طبقے کی اس تین طرفہ تقسیم کا اظہار اس کی سیاست میں بھی ہوتا ہے ؟

اور اگر ہوتا ہے تو کس طرح؟ میرا سیاست کا علم مجھے یہ بتاتا ہے کہ یہ تین طرفہ تقسیم پنجاب کے ایک معاشی طبقے کی تشکیل کرتی ہے جسکا سیاسی موقف ایک ہے اور یہ اپنی اندرونی تقسیم کو "رنگارنگی" کے پردے میں چھپا لیتی ہے- میری دوست نے اس سوال کا جواب پانے میں میری مدد نہیں کی- اسے سیاست سے قطعی دلچسپی نہیں تھی اور اس نے یہ سارے معاملات اپنے بزرگوں کے سپرد کر دئے تھے-

 جواب پانے کے معاملے میں میں تقریباً مایوس ہی ہوچکا تھا کہ میری ملاقات ایک اور نوجوان خاتون سے ہوئی جنکا لہجہ بھی اتنا ہی "بدیسی" تھا- مجھے فوراً ہی اس کے تانے بانے مل گئے اور مجھے ان سے پوچھنے کی ضرورت نہ پڑی کہ ان کے والد اور دادا دادی وغیرہ کونسی زبان بولتے ہیں بلکہ میں ایک نجومی کی طرح انھیں ساری باتیں بتاتا اور وہ سر ہلا کر میری بات سے اتفاق کرتیں بلکہ انہوں نے مجھے ایک کہانی بھی سنائی جس سے ان کی باتوں کی مزید تصدیق ہوتی تھی-