شمالی وزیرستان میں چوبیس گھنٹوں میں دو ڈرون حملے
میرانشاہ: پاکستان کےشمالی وزیرستان کے علاقےمیں امریکی جاسوس طیاروں کے حملے جاری ہیں۔ چوبیس گھنٹوں کے دوران دوسرے حملے میں تین افراد جاں بحق ہوگئے۔
میرانشاہ میں جاسوس طیاروں نے کئی گھنٹے پرواز کے بعد ایک مکان کو نشانہ بنایا۔ دو میزائل حملوں میں تین افراد ہلاک ہوگئے۔
ذرائع کے مطابق ہلاک ہونے والوں کی تاحال شناخت نہیں ہوسکی ہے کہ وہ مقامی ہیں یا غیر ملکی افراد ہیں۔ مزید ہلاکتوں کا خدشہ ظاہر کیا جارہا ہے۔ واقعے کے بعد مقامی لوگوں نے ملبے سے لاشیں نکالنے کا کام شروع کردیا۔
کل ڈرون طیاروں نے شمالی وزیرستان میں ایک گاڑی پر دو میزائل داغے جس کے نتیجے میں چار افراد ہلاک ہو گئے۔
سرکاری ذرائع کےمطابق امریکی جاسوس طیاروں نے تحصیل میران شاہ سے تقریباً تیرہ کلو میٹر دور ایشاء رزمک روڑ ملک اژدر کے علاقے میں ایک گاڑی کو نشانہ بنایا۔ مقامی افراد نے اپنی مدد آپ کے تحت امدادی کارروائی کے ذریعے گاڑی سے لاشوں کو نکالا۔
امریکا شمالی وزیرستان سمیت دیگر علاقوں میں مسلسل ڈرون حملے کررہاہے، جس میں عسکریت پسندوں کے ساتھ معصوم شہری بھی مارے جارہے ہیں۔
میرانشاہ کے مختلف علاقوں میں جاسوس طیاروں کی نچلی پروازیں جاری ہیں، جس سے علاقے میں شدید خوف و ہراس پایا جاتا ہے۔
پارلیمان کی قرارداد اور اعلٰی ترین شخصیات کے بیانات،حکومت، سیاسی و سماجی رہنماؤں کے احتجاج کے باوجود پاکستان میں امریکی ڈرون حملوں کا سلسلہ جاری ہے۔
رواں ماہ کے چوتھے روز میں تیسرا حملہ کیا گیا، جس میں عورتوں اور بچوں سمیت سولہ افراد ہلاک ہوئے۔
شکاگو کانفرنس کے بعدڈرون حملوں میں اضافہ ہوا اورآٹھ حملوں میں پچاس سے زائد افراد مارےجاچکےہیں۔
لائیو ٹی وی