ڈی ریگولیشن کی آڑ میں ہائی آکٹین مہنگا
اسلام آباد: پارکو آئل ریفائنری نے ڈی ریگولیشن کی آڑ میں ہائی آکٹین 3 روپے 50 پیسے فی لیٹر سستا کرنے کے بجائے 4 روپے 41 پیسے فی لیٹر مہنگا کردیا ہے جبکہ اس سلسلے میں پارکو نے اوگرا کے احکامات کو بھی مسترد کردیا ہے۔
اوگرا حکام کے مطابق پارکو نے یکم اکتوبر سے ہائی آکٹین پر عائد ان لینڈ فریٹ ایکولائزیشن چارجز ختم ہونے کی آڑ میں خلاف قانون ہائی آکٹین کی ایکس ریفائنری قیمت 4 روپے 41 پیسے فی لیٹر بڑھا دی ہے۔
اوگرا نے مانیٹرنگ کا کردار ادا کرتے ہوئے پارکو کے اس غیر قانونی اقدام کے خلاف نوٹس لیا اور پارکو کو ہدایت کی وہ فوری طور پر ہائی آکٹین کی 30ستمبر کو رائج قیمت میں ساڑھے تین روپے فی لیٹر تک کمی کرے لیکن پارکو نے اوگرا کے ہدایت پر قیمت کم کرنے سے انکار کردیا۔
پارکو نے اوگرا کو لکھے گئے اپنے خط میں موقف اختیار کیا کہ اگر کوئی آئل مارکیٹنگ کمپنی کراچی سے مظفرگڑھ تک ہائی آکٹین لائے تو اسے ترسیلی اخراجات کی مد میں 4روپے 41پیسے فی لیٹر فریٹ ادا کرنا پڑے گا لہٰذا یہ پارکو کا حق ہے جبکہ درحقیقت ای سی سی کی منظورشدہ پالیسی کے مطابق پارکو کراچی سے مظفرگڑھ تک خام تیل پائپ لائن کے ذریعے لاتی ہے جس پر 60 پیسے فی لیٹر ٹرانسپورٹیشن چارجز کی مد میں صارفین سے وصول کرکے پارکو کو ادا کئے جاتے ہیں۔
خام تیل سے ہی پارکو ہائی آکٹین تیار کرتی ہے لہٰذا اس پرپارکو دوبارہ سے ٹرانسپورٹیشن چارجز کے نام پر 4 روپے 41پیسے فی لیٹر صارفین سے وصول کرنے کی مجاز نہیں۔ پارکو ای سی سی کی منظوری کے بغیر ٹرانسپورٹیشن کے نام پر ایک پیسہ بھی اضافی وصول نہیں کرسکتی۔
پارکو نے ہائی آکٹین کی ایکس ریفائنری قیمت 95.98 روپے مقررکر رکھی ہے۔ اوگرا نے پارکو کو قیمت 91٫57 روپے فی لیٹر مقررکرنے کی ہدایت کی۔
اوگرا نے وزارت پٹرولیم کو اپنے خط میں صورتحال سے آگاہ کرتے ہوئے مداخلت کرنے کی سفارش کی ہے تاکہ ہائی آکٹین کی قیمت میں موجودہ اضافہ واپس ہوسکے۔
حکام کے مطابق یکم اکتوبر سے کراچی کے علاوہ ہائی آکٹین 3.50 روپے فی لیٹر تک سستا جبکہ کراچی میں 36 پیسے فی لیٹر مہنگا ہونا تھا۔
لائیو ٹی وی