ترکی: اسلحہ ڈپو میں دھماکا، 25 فوجی ہلاک
حکام کا کہنا ہے کہ بظاہر یہ دھماکہ دہشت گردی کا واقعہ نہیں بلکہ حادثہ ہے۔ اے پی فوٹو
انقرہ: مغربی ترکی میں قائم ایک فوجی اسلحہ ڈپو میں دھماکے سے پچیس فوجی ہلاک جب کہ چار معمولی زخمی ہوگئے۔
ترک فوج نے اپنی ویب سائٹ پر جاری ایک بیان میں دھماکے کی تصدیق کرتے ہوئے بتایا کہ واقعہ بدھ ۔ جمعرات کی درمیانی شب پیش آیا۔
دھماکے کے بعد ڈپو میں آگ بھڑک اٹھی جس پر حکام کے مطابق جمعرات کی صبح تک قابو پا لیا گیا۔
ترک حکومت کے ایک وزیر کا کہنا ہے کہ بظاہر یہ دہشت گردی کا واقعہ نہیں بلکہ حادثہ ہے۔
ماحولیات وجنگلات کے وزیر نے مقامی ٹیلی وژن کو دیے گئے انٹرویو میں کہا کہ 'یہ بظاہر ایک حادثہ ہے ، یہ یقینی طور پر دہشت گردی کا واقعہ نہیں ہے۔'
وزیر نے شہریوں کو خبردار کیا کہ وہ متاثرہ علاقہ سے دور رہیں کیونکہ دھماکے کے نتیجے میں دستی بموں کی بڑی تعداد علاقے میں زمین پر پھیلی ہوئی ہے۔
دھماکے کی وجوہات کا تا حال تعین نہیں کیا جاسکا ہے۔
لائیو ٹی وی