انٹرنیٹ پر بچوں کی نازیبا تصاویر کی تلاش انتہائی مشکل
لندن: گوگل اور مائیکرو سافٹ نے انٹرنیٹ پر بچوں کے جنسی استحصال کی تصاویر کی تلاش انتہائی مشکل بنانے کے عمل پر اتفاق کیا ہے جس سے بچوں کی نازیبا تصاویر کی تلاش بہت حد تک ناممکن ہو جائے گی۔
گوگل اور مائیکروسافٹ نے ایسے نئے ایلگوردم یا پروگرام کی ہدایات متعارف کروائی ہیں جن کی مدد سے ایسی تصاویر کی تلاش کا عمل روکا جا سکے گا۔
برطانوی اخبار ڈیلی میل میں اپنے مضمون میں گوگل کے چیف ایگزیکٹو ایرک شمٹ نے کہا ہے کہ ان تبدیلیوں کی وجہ سے بچوں کے جنسی استحصال سے متعلق ایک لاکھ سے زیادہ سوالات کے نتائج حذف کر دیے گئے ہیں۔
انہوں نے کہا کہ جلد ہی 150 سے زیادہ زبانوں میں ان تبدیلیوں کو لاگو کر دیا جائے گا چنانچہ اس کا اثر ساری دنیا پر پڑے گا۔
ذرائع ابلاغ کے مطابق ان اقدامات کے تحت اب اس بارے میں ایک لاکھ سے زیادہ الفاظ اگر ’گوگل‘ اور ’بنگ‘ سرچ انجنوں پر تلاش کیے جائیں گے تو ڈھونڈنے والے فرد کو نہ صرف کوئی معلومات نہ مل سکیں گی بلکہ اسے یہ تنبیہ بھی کی جائے گی کہ بچوں کے جنسی استحصال کی تصاویر غیرقانونی ہیں۔
اسی طرح مائیکرو سافٹ کا بھی کہنا ہے کہ بچوں کے جنسی استحصال سے متعلق مواد کے بارے میں کمپنی پہلے ہی ’زیرو ٹالرنس‘ کی پالیسی پر عمل پیرا ہے اور اب وہ رسائی روکنے کے لیے مزید سخت انتظامات کر رہی ہے۔
مائیکروسافٹ کی فوٹو ڈی این اے کی سہولت پر تصویر کو ایک الگ ’فنگر پرنٹ‘ دیتی ہے جس کی مدد سے اسے انٹرنیٹ پر شیئر کرنے والوں کو ڈھونڈنا ممکن ہوتا ہے اور اب گوگل نے بھی اپنی ویڈیوز کے لیے ایسا نظام بنایا ہے۔
لائیو ٹی وی