مولانا فضل اللہ کا اہم ساتھی نوشہرہ سے گرفتار
نوشہرہ: سوات طالبان کے رہنما مولانا فضل اللہ کے اہم ساتھی اور کالعدم تحریک طالبان پاکستان سوات کے ایک اہم کمانڈر کو نوشہرہ کے علاقے اکوڑہ خٹک سے گرفتار کرلیا گیا ہے۔
انٹیلی جنس ذرائع کا کہنا ہے کہ جمعرات کے روز سوات کی سیکیورٹی فورسز نے اکوڑہ خٹک پولیس اسٹیشن کی حدود میں واقع علاقے مرہٹی میں ایک سرچ آپریشن کے دوران احسان اللہ احسان کو گرفتار کیا۔
ذرائع کے مطابق احسان اللہ کا تعلق شنگلہ سے ہے اور وہ مولانا فضل اللہ کا قریبی ساتھی ہونے کے ساتھ ساتھ ان کا ذاتی ڈرائیور بھی ہے۔
ڈپٹی سپرنٹنڈنٹ پولیس اکوڑہ خٹک نے معاملے سے لاتعلقی ظاہر کرتے ہوئے کہا کہ آپریشن شاید دوسرے حساس اداروں نے کیا ہے۔
تاہم اس حوالے سے ذرائع کا کہنا ہے کہ سوات سے آرمی کے کچھ لوگ آئے تھے اور انہوں نے نوشہرہ میں آپریشن کیا اور اس بارے میں مقامی پولیس تک کو کوئی اطلاع نہیں دی گئی۔
یاد رہے کہ سوات طالبان کے گرفتار کمانڈر کا تحریک طالبان پاکستان کے ترجمان اور ہم نام احسان اللہ احسان سے کوئی تعلق نہیں۔ ذرائع کے مطابق تحریک طالبان پاکستان کے مذکورہ کمانڈر اس وقت جنوبی وزیرستان میں مقیم ہیں۔
لائیو ٹی وی