وزیراعلیٰ سندھ نے کراچی میں ہیوی ٹرانسپورٹ وہیکلز کے لیے رفتار کی حد 30 کلومیٹر فی گھنٹہ مقرر کرتے ہوئے ڈرائیورز کے لیے رینڈم ڈرگ ٹیسٹ لازمی قرار دے دیا۔

ڈان نیوز کے مطابق وزیر اعلیٰ سندھ کی زیر صدارت کراچی میں ٹریفک مسائل سے متعلق اہم اجلاس ہوا۔

وزیراعلیٰ سندھ نے کہا کہ شہر میں بڑھتے ہوئے ٹریفک حادثات پر انتہائی افسردہ ہوں، ‏انسانی جانوں کا ضیاع ناقابل برداشت ہے، ماؤں کی گودیں اجڑ رہی ہیں، ٹریفک اور ضلع پولیس مل کر کام کرے،مجھے صرف ٹریفک حادثات کی روک تھام چاہیے۔

انہوں نے حکم دیا کہ ‏‎تمام ہیوی وہیکلز چلانے والوں کے ڈرائیونگ لائسنس چیک کیے جائیں۔

‎آئی جی سندھ پولیس نے اجلاس کو بتایا کہ شہر میں 2024 میں 16 لاکھ 7 ہزار 65 چالان ہوئے جس میں 1336 ملین روپے جرمانہ وصول کیا گیا جبکہ 5 لاکھ 12 ہزار 190 گاڑیوں کے خلاف کارروائیاں ہوئیں اور 11 ہزار 287 ڈرائیورز حراست میں لیے گئے۔

آئی جی نے بتایا کہ گزشتہ سال مجموعی طور پر 650 ایف آئی آرز درج کی گئیں اور 7555 فٹنس سرٹیفکیٹ منسوخ کیے گئے۔

بھاری گاڑیوں اور پبلک ٹرانسپورٹ میں ٹریکر اور ڈیش کیم کی تنصیب لازمی قرار

اس موقع پر وزیراعلیٰ سندھ نے تمام ہیوی ٹرانسپورٹ وہیکلز، لائٹ ٹرانسپورٹ وہیکلز اور پبلک سروس وہیکلز میں ٹریکر اور ڈیش کیم کی تنصیب کو لازمی قرار دے دیا۔

وزیر اعلیٰ سندھ نے کہا کہ تمام بھاری و ہلکی گاڑیوں میں انڈر رن پروٹیکشن ڈیوائسز کی تنصیب لازمی ہے، لیک کرتے یا بفل پلیٹس کے بغیر واٹر ٹینکرز کا سڑکوں پر چلنا ممنوع ہے۔

مراد علی شاہ نے کہا کہ کراچی میں ہیوی ٹرانسپورٹ وہیکلز کے لیے رفتار کی حد 30 کلومیٹر فی گھنٹہ ہوگی، محکمہ ٹرانسپورٹ، ایکسائز، لائسنسنگ اتھارٹی، ٹریفک پولیس اور نادرا کو منسلک کیا جائے گا، ٹریفک قوانین پرمؤثر اور ہم آہنگ عملدرآمد ممکن بنایا جائے۔

وزیر اعلیٰ سندھ کا کہنا تھا کہ ٹریفک انجینئرنگ بیورو کی تنظیم نو کی جائے گی اور اسے میئر کے ماتحت کر دیا جائے گا، ڈرائیونگ لائسنس سے قبل ڈرائیورز کے لیے بین الاقوامی معیار کی تربیت لازمی ہوگی جب کہ غیر قانونی نمبر پلیٹس، کالے شیشے، غیر مجاز سائرن و لائٹس کے خلاف کریک ڈاؤن کیا جائے۔

ٹرپل سواری اور ہیلمٹ نہ پہننے والوں کیخلاف بھی کارروائی کی ہدایت

وزیراعلیٰ سندھ نے ہیلمٹ استعمال نہ کرنے والے اور ٹرپل سواری کرنے والے موٹرسائیکل سواروں کے خلاف کارروائی کی ہدایت بھی کی۔

مراد علی شاہ نے کہا کہ جن گاڑیوں کےفٹنس سرٹیفکیٹ منسوخ ہوگئے ہیں انہیں ضبط کیا جائے اور ان گاڑیوں کو دوبارہ اجازت محکمہ ٹرانسپورٹ سے مشروط ہوگی۔

انہوں نے بھاری و ہلکی گاڑیوں کے ڈرائیورز کے لیے ڈرگ ٹیسٹ لازمی قرار دے دیا، مراد علی شاہ نے فیصلوں پر فوری عملدرآمد کے لیے اعلیٰ سطح کی کمیٹی قائم کی جس کی نگرانی آئی جی پولیس کریں گے۔