ریلوے کا پنجاب اور سندھ میں تجاوزات کے خاتمے کیلئے آپریشن کا فیصلہ
محکمہ ریلوے نے پنجاب اور سندھ میں ریلوے اراضی پر تجاوزات کے خاتمے کے لیے آپریشن شروع کرنے کا فیصلہ کیا ہے، وزیر ریلوے حنیف عباسی نے3 ماہ میں ٹرینوں کی باقاعدگی 90 سے 95 فیصد تک لانے کا ٹاسک دیتے ہوئے کہا ہے کہ وزیر سمیت کسی شخص کیلئےٹرین لیٹ نہیں ہوگی۔
ڈان نیوز کے مطابق وفاقی وزیر ریلوے محمد حنیف عباسی کی زیرِ صدارت اجلاس منعقد ہوا جس میں ریلوے انفرااسٹرکچر پر تفصیلی بریفنگ دی گئی اور ڈویژنز کی کارکردگی کا جائزہ لیا گیا۔
وزیر ریلوے نے افسران کو ہدایت کی کہ ایم ایل ون پر سفری دورانیہ کم کرنے کیلیے اقدامات کیے جائیں اور کیماڑی، حیدرآباد سیکشن پر فوری طور پر کام شروع کیا جائے۔
وفاقی وزیر نے ایم ایل ون پر انجینئرنگ ریسٹرکشنز کے خاتمے کے لیے ایک سال کا ٹاسک دیتے ہوئے ہدایت کی کہ ٹریک بحالی کے پراجیکٹس پر کام تیز کیا جائے۔
انہوں نے کہاکہ پراجیکٹ ڈائریکٹر 6 ماہ میں سلیپر تیار کرکے دیں، انتظامیہ 2 سال کا منصوبہ ایک سال میں مکمل کرے، سال کے آخر تک 4 ٹیمپنگ مشینیں قابلِ استعمال بنائی جائیں۔
حنیف عباسی نے ہدایت کی کہ مال گاڑیوں سے زیادہ ریونیو حاصل کیا جائے، لیکیج روکی جائے۔
اجلاس میں مال گاڑیوں کی بکنگ آن لائن کر کے انسانی مداخلت ختم کرنے کا فیصلہ کا بھی فیصلہ کیا گیا۔
وزیر ریلوے نے ریلوے کالونیوں میں غیر قانونی طور پر مقیم افراد کی فہرست مانگ لی جبکہ غیرمتعلقہ افراد اور ریٹائرڈ افسران کی ریلوے ریسٹ ہاؤسزمیں رہائش پرمکمل پابندی لگا دی گئی۔
وزیر ریلوے نے ریلوے حکام کو 3 ماہ میں ٹرینوں کی باقاعدگی 90 سے 95 فیصد تک لانے کا ٹاسک دے دیا، حنیف عباسی نے کہا کہ ٹرینوں کی باقاعدگی خود مانیٹر کروں گا، وزیر سمیت کسی شخص کے لیے ٹرین لیٹ نہیں ہوگی، کارکردگی کے جائزے کے لیے عملے کے بغیر دفاتر اور اسٹیشنز کا دورہ کروں گا۔
اجلاس میں تمام بڑے ریلوے اسٹیشنز پر ایلی ویٹر لگانے کا فیصلہ کیا گیا ہے جس کی ابتدا راولپنڈی اسٹیشن سے کی جائے گی۔
اجلاس میں ریلوے اراضی پر تجاوزات کے خاتمے کے لیے پنجاب اور سندھ سے آپریشن شروع کرنے کا فیصلہ کیا گیا۔
وزیر ریلوے نے کمرشل پوٹینشل کی حامل ریلوے زمینوں کا بریک اپ طلب کرتے ہوئے تمام ڈویژنز کو لِیز کی گئی زمینوں کی تفصیل جمع کروانے کی ہدایت کی ہے۔
لائیو ٹی وی