ٹنڈوالہ یار: کراچی سے آنے والے چار نوجوان دوست کار نہر میں گرنے سے جاں بحق
ضلع ٹنڈوالہ یار میں نصیر کینال میں کار گرنے سے اس میں سوار چار دوست جاں بحق ہوگئے۔
میرپورخاص کے سینئر سپرنٹنڈنٹ آف پولیس (ایس ایس پی) سلیم شاہ نے ڈان ڈاٹ کام کو بتایا کہ چاروں افراد کراچی سے ایک کار میں سفر کر رہے تھے کہ تیز رفتاری کی وجہ سے ان کی کار نہر میں گر گئی۔
ایس ایس پی نے بتایا کہ جاں بحق ہونے والوں کی شناخت 23 سالہ عبدالاحد شیخ ولد محمد اسلم شیخ ،21 سالہ سمیر ولد رضوان الدین صدیقی، 26 سالہ علی شان ولد محمد اقبال اور 20 سالہ عدیل ولد محمد اعظم فاروقی کے طور پر ہوئی ہے۔
انہوں نے بتایا کہ لااشوں کو نکالنے کے بعد گزشتہ رات ہی کراچی منتقل کر دیا گیا تھا۔
ٹندوالہ یار پولیس کے ترجمان امین گل اوڈھ نے بتایا کہ عبدالاحد میرپورخاص کا رہائشی تھا اور کراچی منتقل ہو گیا تھا، وہ اپنے کزن اسفند لغاری سے میرپورخاص میں کرائے کی کار میں اپنے دوستوں کے ساتھ ملنے آ رہا تھا۔
امین گل اوڈھ نے مزید بتایا کہ علی شان سیالکوٹ پنجاب کا رہائشی تھا لیکن کراچی میں مقیم تھا، یہ تمام دوست کراچی میں ایک ہی علاقے میں رہائش پذیر تھے۔
مقامی لوگوں نے پولیس کو بتایا کہ سمیر اور عدیل بھی میرپورخاص سیٹلائٹ ٹاؤن کے رہائشی تھے لیکن ان کے خاندان کراچی منتقل ہو گئے تھے۔
حادثے کے فوری بعد مقامی غوطہ خور انہیں بچانے کے لیے نہر میں کود گئے تھے مگر چاروں دوست اس وقت تک جاں بحق ہوچکے تھے۔
اس واقعے کو مقامی باشندوں نے سوشل میڈیا پلیٹ فارمز پر بڑے پیمانے پر کور کیا، ان میں سے ایک، پنہال ناریجو نے ایک غوطہ خور سے بات کی جس کی دکان نہر پر بنے پل پر واقع تھی۔
اس شخص نے بتایا کہ سڑک میں ’ ڈیزائن کی خرابی ’ کی وجہ سے کار پل عبور کرنے کے بجائے نہر میں گر گئی۔
ایس ایس پی کے مطابق، میرپورخاص اور ٹندوالہ یار کے درمیان پل کی طرف جانے والی سڑک دو رویہ تھی لیکن نہر پر ایک رویہ سڑک والا پل بنایا گیا تھا۔
لائیو ٹی وی