’کراچی انٹر بورڈ نے بچوں کے ساتھ ناانصافی کی‘، طلبہ کو گریس مارکس دینے کی سفارش
کراچی انٹرمیڈیٹ بورڈ کے امتحانات کے نتائج پر اعتراض کے حوالے سے سندھ اسمبلی کی قائم کردہ کمیٹی کی فیکٹ فائنڈنگ انکوائری کمیٹی نے رپورٹ میں امتحانات کے طریقہ کار، اسسمینٹ، امتحانی رکارڈ اور مارکس شیٹ تک کے مراحل میں بے ضابطگیوں اور بے قاعدگیوں کی نشاندہی کے بعد طلبہ کو گریس مارکس دینے کی سفارش کردی۔
سماجی رابطے کی ویب سائٹ پر فیس بک پر جاری اعلامیے کے مطابق کمیٹی چیئرمین اور وزیر تعلیم سندھ سید سردار علی شاہ نے کہا کہ بورڈز کی طرف سے بچوں کے ساتھ ناانصافی کی گئی، کراچی کے بورڈ پچھلے 8 برس نتائج کے حوالے بددیانتی کا ارتکاب کرتے آ رہے ہیں اس سلسلے کو اب روکنا ہوگا۔
منگل کے روز کمیٹی اجلاس کے بعد سندھ اسمبلی میں میڈیا کارنر پر صحافیوں سے بات کرتے ہوئے صوبائی وزیر سید سردار علی شاہ نے کہا کہ این ای ڈی یونیورسٹی کے وائس چانسلر ڈاکٹر سروش لودھی کی سربراہی میں ہونے والی انکوائری میں بورڈ کی طرف کی شدید بے ضابطگیوں کی نشاندہی ہوئی ہے۔
ان کا کہنا تھا کہ انکوائری کمیٹی کو یہ اختیار دیا گیا ہے کہ وہ ذمہ داران کی نشاندہی کرے، ہم ایسے عناصر کے خلاف رولز کے تحت کارروائی کی سفارش کریں گے۔
صوبائی وزیر نے کہا کہ ہم بچوں کے ساتھ ناانصافی نہیں ہونے دیں گے، کمیٹی ممبران کے اتفاق کے بعد بچوں کو گیارہویں کے فزکس کے پیپر میں 15 فیصد، کیمسٹری میں 20 فیصد جبکہ ریاضی میں 15 فیصد مارکس بڑھانے کی سفارش کی جائے گی۔
صوبائی وزیر نے کہا کہ بورڈ میں اصلاحات کی ضرورت ہے، کمیٹی کے مینڈیٹ کو سندھ کے بورڈز کے اصلاحات کے لیے استعمال کیا جائے گا، ہم اس سفر کو آگے جاری رکھیں گے، بورڈ پر نظرثانی کرنے کے لیے ایک مرکزی نظام بھی بنانے کی ضرورت ہے۔
سید سردار علی شاہ کا کہنا تھا کہ بدقسمتی سے یہ کہنا پڑ رہا ہے کہ کراچی انٹر بورڈ کا کردار مافیا کی طرح ہو گیا، جو بچے میٹرک میں اچھے مارکس لے کر آ رہے انہیں بچوں کی فرسٹ ایئر کی پرفارمنس کو نتائج کی شکل میں پیش کیا گیا۔
انہوں نے کہا کہ دیگر بورڈز کے مقابلے میں کراچی بورڈ کے خراب نتائج کی وجہ سے ایک تاثر پیدا ہوا، ہم وزیر اعلیٰ سندھ کو کمیٹی کی میں پیش کردہ تمام سفارشات پیش کریں گے۔
قبل ازیں بورڈ امتحانات نتائج پر اعتراضات کے حوالے سندھ اسمبلی کی قائم کردہ کمیٹی کا اجلاس سندھ اسمبلی کمیٹی روم میں منعقد ہوا، وزیر تعلیم سندھ سید سردار علی شاہ کی کمیٹی چیئرمین کی حیثیت سے اجلاس کی صدارت کی۔
جلاس میں اراکین اسمبلی، محمد یوسف بلوچ، اعجاز خان، عبدالوسیم، طٰہٰ احمد خان، محمد فاروق اور محمد شبیر نے بحیثیت کمیٹی ممبران شرکت کی۔
لائیو ٹی وی