ارتھ آور زمین کے تحفظ کیلئے ہمارے مشترکہ عزم کی علامت ہے ، اسپیکر قومی اسمبلی
اسپیکر قومی اسمبلی سردار ایاز صادق نے ارتھ آور 2025 کے موقع پر اپنے پیغام میں کہا ہے کہ پاکستان کی قومی اسمبلی اس عالمی مہم میں شامل ہو کر ماحولیاتی تحفظ کے لیے اپنے عزم کا اعادہ کر رہی ہے۔
قومی اسمبلی سیکرٹریٹ کے ڈائریکٹوریٹ جنرل آف میڈیا کی پریس ریلیز کے مطابق اسپیکر قومی اسمبلی نے کہا کہ ارتھ آور محض ایک گھنٹے کے لیے بجلی بند کرنے کا نام نہیں، بلکہ یہ سرحدوں، سیاست اور عقائد سے بالاتر ہو کر زمین کے تحفظ کے لیے ہمارے مشترکہ عزم کی علامت ہے۔
انہوں نے کہا کہ پاکستان کی قومی اسمبلی ڈبلیو ڈبلیو ایف کے تعاون سے، ہر سال ارتھ آور کے دوران پارلیمنٹ ہاؤس کی غیر ضروری روشنیاں ایک گھنٹے کے لیے بجھا کر کرہ ارض سے یکجہتی کا اظہار کرتی ہے۔
اسپیکر قومی اسمبلی نے کہا کہ اس روایت کو برقرار رکھتے ہوئے، آج، مورخہ 22 مارچ 2025، رات 8:30 سے 9:30 بجے تک پارلیمنٹ ہاؤس کی غیر ضروری روشنیاں بند کر دی جائیں گی تاکہ عوام میں ماحولیاتی مسائل کے حوالے سے شعور اجاگر کیا جا سکے۔
اسپیکر نے کہا کہ جب ہم ایک گھنٹے کے لیے لائٹیں بند کرتے ہیں، تو ہمیں اس حقیقت پر غور کرنا چاہیے کہ انفرادی اقدامات اجتماعی طور پر بڑی تبدیلی کا سبب بن سکتے ہیں۔ انہوں نے مزید کہا کہ چھوٹے، مثبت اقدامات مل کر پائیداری اور ماحولیاتی تحفظ کے بڑے مقصد میں اہم کردار ادا کرتے ہیں۔
انہوں نے اس بات پر بھی زور دیا کہ پاکستان، جو اپنے متنوع ماحولیاتی نظام اور قدرتی وسائل سے مالا مال ہے، موسمیاتی تبدیلیوں کے سنگین اثرات سے دوچار ممالک میں شامل ہے۔
اسپیکر قومی اسمبلی نے کہا کہ موسمیاتی بحران سے نمٹنے کے لیے مربوط حکمت عملی اور عملی اقدامات ناگزیر ہیں تاکہ آنے والی نسلوں کو ایک محفوظ اور خوشحال زمین فراہم کی جا سکے۔
اسپیکر سردار ایاز صادق نے مزید کہا کہ فضائی آلودگی میں کمی، زہریلی گیسوں کے اخراج پر قابو پانے، قدرتی وسائل کے دانشمندانہ استعمال اور ماحول دوست پالیسیوں کے فروغ کی ضرورت پہلے سے کہیں زیادہ بڑھ گئی ہے۔
انہوں نے تمام طبقات پر زور دیا کہ وہ ماحولیاتی تحفظ کو اپنی اولین ترجیح بنائیں اور اپنی روزمرہ زندگی میں پائیدار طرز عمل اپنائیں تاکہ ایک صحت مند اور متوازن ماحول کی ضمانت دی جا سکے۔
انہوں نے کہا کہ اگر ہم متحد ہو کر کام کریں، تو ایک روشن، سرسبز اور خوشحال زمین کی تشکیل ممکن ہے۔ انہوں نے عوام سے اپیل کی کہ وہ ارتھ آور 2025 کو نہ صرف ایک علامتی اقدام کے طور پر اپنائیں بلکہ اسے اپنی طرزِ زندگی کا مستقل حصہ بنائیں، تاکہ زمین کے تحفظ کے لیے ٹھوس اور مؤثر اقدامات کیے جا سکیں۔
اسپیکر قومی اسمبلی سردار ایاز صادق نے ڈبلیو ڈبلیو ایف کے کردار کو کرہ ارض اور ماحولیاتی تحفظ کیلئے قابل ستائش قرار دیا۔
لائیو ٹی وی