وفاقی وزیر ریلوے محمد حنیف عباسی نے عید الفطر کے موقع پر ٹرین کے کرایوں میں 20 فیصد کمی کا اعلان کردیا۔

ڈان نیوز کے مطابق وزارت ریلوے سے جاری بیان میں کہا گیا ہے کہ کرایوں میں کمی کا اطلاق تمام میل، ایکسپریس اور انٹرسٹی مسافر ٹرینوں پر ہوگا۔

کرایوں میں کمی کا اطلاق عید کے تینوں دنوں کی بکنگ پر ہوگا، تاہم اس کا اطلاق خصوصی عید ٹرینوں پر نہیں ہوگا۔

بیان میں مزید کہا گیا ہے کہ خصوصی رعایت کا مقصد عید کے موقع پر عوام کو ریلیف فراہم کرنا ہے، جبکہ یہ اقدام عید کے موقع پر ملک بھر کے مسافروں کے لیے خوشی کا باعث ہے۔

عید اسپیشل ٹرینوں کا شیڈول جاری

دوسری جانب پاکستان ریلوے کی جانب سے عوام کے لیے عید پر 5 اسپیشل ٹرینیں چلائی جائیں گی۔

پہلی اسپیشل ٹرین 26 مارچ کو کراچی کینٹ سے براستہ ملتان، ساہیوال اور لاہور روانہ ہوگی، دوسری اسپیشل ٹرین 26 مارچ کو کوئٹہ سے پشاور روانہ ہوگی، جبکہ تیسری اسپیشل ٹرین 27 مارچ کو لاہور سے براستہ ملتان اور کراچی روانہ ہوگی۔

چوتھی اسپیشل ٹرین 27 مارچ کو کراچی سے راولپنڈی روانہ ہوگی جبکہ پانچویں اسپیشل ٹرین 28 مارچ کو کراچی کینٹ سے براستہ ملتان اور لاہور روانہ ہوگی۔

تمام ٹرینیں اکانومی، اے سی بزنس اور اے سی اسٹینڈرڈ کلاس پر مشتمل ہوں گی۔