ٹرمپ نے جوبائیڈن کی جانب سے دی جانے والی معافیوں کو کالعدم قرار دے دیا
امریکی صدر ڈونلڈ ٹرمپ نے سابق صدر جوبائیڈن کی جانب سے آخری لمحات میں اپنے اہل خانہ سمیت دیگر افراد کو دی جانے والی معافیوں کو کالعدم قرار دیتے ہوئے کہا کہ بائیڈن نے ان پر ’آٹو پین‘ کے ساتھ دستخط کیے تھے۔
امریکی اخبار ’دی ہل‘ میں شائع رپورٹ کے مطابق ڈونلڈ ٹرمپ نے سماجی رابطے کی ویب سائٹ ’ٹرتھ سوشل‘ پر اپنی پوسٹ میں سابق صدر بائیڈن کی آخری لمحات میں دی گئی معافیوں کو کالعدم قرار دے دیا۔
ان کا کہنا تھا ’جوبائیڈن نے سیاسی ٹھگوں کی کمیٹی سمیت دیگر افراد کو جو معافی دی تھی وہ کالعدم اور مزید قابل عمل نہیں ہیں کیوں کہ انہوں نے ان پر آٹو پین سے دستخط کیے تھے۔
یاد رہے کہ سابق صدر جوبائیڈن نے وائٹ ہاؤس میں اپنے آخری گھنٹوں میں ایک غیر معمولی قدم اٹھاتے ہوئے اپنے سیاسی دشمنوں اور ڈونلڈ ٹرمپ کے حامیوں کو معاف کردیا تھا جن میں 6 جنوری 2021 کو یو ایس کیپیٹل ہل پر ہونے والے پرتشدد حملے کی تحقیقات کرنے والی امریکی ایوان نمائندگان کی کمیٹی کے ارکان، عملے اور عینی شاہدین بھی شامل تھے۔
اس کے علاوہ، جوبائیڈن نے اپنے اہل خانہ، متعدد عہدیداروں اور خاندان کے قریبی افراد کو بھی قبل از وقت معافی دے دی تھی۔
اس حوالے سے بہت بحث ہوئی تھی کہ جوبائیڈن اپنا ایگزیکٹو ایکشن استعمال کرتے ہوئے ان لوگوں کو بھی معافی دیں گے جن پر ٹرمپ انتظامیہ کی جانب سے مقدمہ چلائے جانے کا خدشہ ہے۔
ڈونلڈ ٹرمپ نے پیر کے روز اپنی پوسٹ میں کہا کہ بائیڈن نے کاغذات پر دستخط نہیں کیے اور وہ ان کے بارے میں کچھ بھی نہیں جانتے۔
اگرچہ امریکا کی عدالتوں نے معافی دینے کا اختیار بڑی حد تک صدر پر ہی چھوڑا ہے لیکن ٹرمپ نے اپنی پوسٹ میں کہا کہ ایوان نمائندگان کی کمیٹی میں شامل افراد کو ’اعلیٰ سطح پر‘ تحقیقات کی توقع کرنی چاہیے۔
بعد ازاں، صحافیوں سے غیر رسمی گفتگو کے دوران ڈونلڈ ٹرمپ نے کہا کہ میرے خیال میں بائیڈن کی معافی آٹوپین کی وجہ سے کالعدم ہے۔
ان کا یہ بیان ایسے وقت میں سامنے آیا ہے جب ہیریٹیج فاؤنڈیشن کی ایک ذیلی تنظیم کی رپورٹ میں کہا گیا تھا کہ جوبائیڈن نے عہدہ چھوڑنے سے قبل معافی پر دستخط کرنے کے لیے آٹوپین کا استعمال کیا تھا۔
اگرچہ امریکا کے صدر کو کسی بھی شخص کو معافی دینے کا اختیار حاصل ہے اور امریکی آئین کے مطابق بعد میں آنے والا کوئی بھی صدر کسی بھی وجہ سے انہیں منسوخ نہیں کرسکتا ہے۔
بائیڈن انتظامیہ کی جانب سے اس بات کی تصدیق نہیں کی گئی ہے کہ آیا سابق صدر نے معافی کے لیے آٹوپین کا استعمال کیا تھا یا نہیں۔
لائیو ٹی وی