وزیراعظم دو روزہ سرکاری دورے پر کل متحدہ عرب امارات روانہ ہوں گے
وزیر اعظم شہباز شریف ورلڈ گورنمنٹس سمٹ (ڈبلیو جی ایس) میں شرکت کے لیے متحدہ عرب امارات (یو اے ای) کا دو روزہ سرکاری دورہ کریں گے۔
ایسوسی ایٹڈ پریس آف پاکستان (اے پی پی) کے مطابق وزیر اعظم شہباز شریف متحدہ عرب امارات کے نائب صدر اور وزیراعظم شیخ محمد بن راشد المکتوم کی دعوت پر ورلڈ گورنمنٹس سمٹ میں شرکت کے لیے 10 سے 11 فروری 2025 تک یو اے ای کا دو روزہ سرکاری دورہ کریں گے۔
ترجمان وزارت خارجہ کی جانب سے اتوار کو جاری بیان کے مطابق شیخ محمد بن راشد المکتوم کی سربراہی میں منعقدہ اجلاس میں گورننس، اختراعات اور بین الاقوامی تعاون کے مستقبل پر تبادلہ خیال کیا جائے گا۔
جس کے لیے مختلف ریاستوں کے سربراہان، عالمی پالیسی سازوں اور نجی شعبے کے سرکردہ رہنماؤں کو مدعو کیا گیا ہے۔
یاد رہے کہ وزیر اعظم شہباز شریف کا مارچ 2024 میں عہدہ سنبھالنے کے بعد متحدہ عرب امارات کا یہ دوسرا دورہ ہے۔
وزیر اعظم کے ہمراہ نائب وزیر اعظم اور وزیر خارجہ سینیٹر اسحٰق ڈار ، کابینہ کے اہم ارکان اور ایک اعلیٰ سطحی وفد بھی ہوگا۔
اپنے دورے کے دوران وزیراعظم ڈبلیو جی ایس سے اپنے خطاب میں جامع اقتصادی ترقی، ڈیجیٹل تبدیلی اور گورننس اصلاحات کے لیے پاکستان کے وژن کو اجاگر کریں گے۔
اس دوران، شہباز شریف متحدہ عرب امارات کی قیادت کے ساتھ دوطرفہ ملاقاتیں بھی کریں گے جب کہ دیگر سربراہان مملکت اور ملٹی نیشنل کمپنیوں کے سرکردہ چیف ایگزیکٹو افسران سے بھی ملاقات کریں گے۔
لائیو ٹی وی