ترک صدر کے دورہ پاکستان کے دوران متعدد مفاہمتی یادداشتوں پر دستخط کا امکان
پاکستان اور ترکیہ کے درمیان صدر طیب اردوان کے آئندہ دورہ پاکستان کے دوران زرعی شعبے سمیت اقتصادی تعاون کو بڑھانے کے لیے مفاہمت کی متعدد یادداشتوں پر دستخط کیے جانے کا امکان ہے۔
ڈان اخبار کی رپورٹ کے مطابق پاکستان اور ترکیہ کی قومی غذائی تحفظ اور زراعت کی وزارتوں کے سینئر حکام نے زراعت اور لائیو اسٹاک کے شعبوں میں مستقبل کے تعاون کے لیے ایک ایکشن پلان وضع کرنے کے لیے میٹنگ کی۔
پاکستان نے ترکیہ کو ملک میں 22 کروڑ جانوروں کو اجاگر کرتے ہوئے مویشیوں کی ویکسی نیشن میں سرمایہ کاری کرنے کی دعوت دی ہے، جبکہ ترکیہ نے پاکستان کی زرعی پیداوار بڑھانے کے لیے اپنے مکمل تعاون کی یقین دہانی کرائی ہے۔
ترک صدر طیب اردوان کا 12 فروری کو پاکستان کا دورہ متوقع ہے جہاں وہ 13 فروری کو وزیر اعظم شہباز شریف کے ساتھ پاکستان-ترکیہ ہائی لیول اسٹریٹجک کوآپریشن کونسل (ایچ ایل ایس سی سی) کے ساتویں اجلاس میں شریک صدارت ہوں گے۔
ایچ ایل ایس سی سی اعلیٰ سطح کا فیصلہ سازی کا فورم ہے جو دونوں ممالک کے درمیان اقتصادی تعلقات کو مزید مضبوط کرنے کے لیے اسٹریٹجک سمت فراہم کرتا ہے۔ کونسل کے سات مشترکہ ورکنگ گروپس ہیں جو سیاسی ہم آہنگی، تجارت اور سرمایہ کاری، توانائی، بینکنگ اور مالیات، ٹرانسپورٹ اور مواصلات، ثقافت اور سیاحت اور تعلیم پر توجہ مرکوز کرتے ہیں۔
ملاقات کے دوران دونوں فریقین نے نامیاتی کاشتکاری، ماہی گیری، آبی وسائل، نرسری تکنیک اور آبی زراعت کی افزائش میں تعاون بڑھانے پر بھی تبادلہ خیال کیا۔
ملاقات میں دونوں ممالک کے ماہرین نے شرکت کی جہاں تعاون کے مختلف شعبوں پر تفصیلی تبادلہ خیال کیا گیا۔ دونوں اطراف نے مزید تعاون کو آسان بنانے اور دونوں ممالک کے نجی شعبے کے اسٹیک ہولڈرز کو جوڑنے کے لیے رابطہ پوائنٹس کا اشتراک کرنے پر اتفاق کیا۔ ترکیہ نے پاکستان کی زرعی پیداوار بڑھانے کے لیے مکمل تعاون کا عزم کیا۔
انہوں نے پاکستان اور ترکیہ کے درمیان مضبوط تاریخی اور ثقافتی تعلقات کو تسلیم کیا اور زراعت اور لائیو اسٹاک کی معیشت کے اہم ستونوں کے طور پر اہمیت پر زور دیا۔ انہوں نے تعاون کو بڑھانے کے لیے اختراعی حل پر مل کر کام کرنے پر اتفاق کیا۔
وسیع زرعی زمین اور سازگار حالات کے باوجود پاکستان کی زرعی برآمدات اس کی صلاحیت سے کم ہیں۔ ترکیہ کے ساتھ تعاون سے پیداوار اور برآمدات میں نمایاں بہتری کی توقع ہے۔
وزارت قومی غذائی تحفظ و زراعت نے طویل مدتی بین الاقوامی شراکت داری کے ذریعے زراعت اور لائیو اسٹاک کے شعبوں کو آگے بڑھانے کے اپنے عزم کا اعادہ کیا۔
لائیو ٹی وی