’قبل از وقت، کم وزن پیدائش کی وجہ سے پاکستان کو سالانہ 7 ارب ڈالر سے زائد کا نقصان‘
نیوٹریشن انٹرنیشنل کی رپورٹ میں انکشاف کیا گیا ہے کہ قبل از وقت اور کم وزن پیدائش کی وجہ سے پاکستان کو سالانہ 7 ارب ڈالر سے زائد کا نقصان ہوتا ہے۔
ڈان نیوز کے مطابق رپورٹ میں کہا گیا ہے کہ کم وزن اور قبل از وقت پیدا ہونے والے بچوں کی پیدائش پاکستان میں ایک پوشیدہ لیکن صحت کے سنگین بحران کو جنم دے رہی ہے، جو معاشی نقصانات میں سالانہ 7.1 ارب ڈالر کا حیران کن حصہ ڈال رہی ہے، نیوٹریشن انٹرنیشنل کی اِن ایکشن رپورٹ کے مطابق یہ مجموعی قومی آمدنی کا 1.9 فیصد ہے۔
رپورٹ کے مطابق قبل از وقت پیدائش اور کم وزن نظامِ صحت کے لیے اہم چیلنج ہے، نوزائیدہ بچوں کی زندگی بھر کی ترقی کو خطرے میں ڈال کر قوم کے انسانی سرمائے اور پیداواری صلاحیت پر بہت زیادہ نقصان کا سبب بنتی ہے۔
مزید روشنی ڈالی گئی ہے کہ پاکستان میں 22 فیصد نوزائیدہ بچوں کی درجہ بندی کم پیدائشی وزن (2500 گرام سے کم) کے طور پر کی جاتی ہے، ہمارا ملک جنوبی ایشیا میں دوسرے، اور عالمی سطح پر اس صورتحال کے لیے چوتھے نمبر پر ہے۔
ہر سال، کم پیدائشی وزن کے تقریباً 14 لاکھ نئے کیسز رپورٹ ہوتے ہیں، جو قبل از وقت پیدائش اور زچگی کی صحت سے نمٹنے کے لیے جامع کارروائیوں کی فوری ضرورت پر زور دیتے ہیں۔
نیوٹریشن انٹرنیشنل کی کنٹری ڈائریکٹر ڈاکٹر شبینہ رضا نے کہا کہ کم پیدائشی وزن کے طویل مدتی نتائج گہرے ہوتے ہیں، جس کی وجہ سے علمی افعال میں کمی، اسکول نہ جانے والوں میں اضافہ، اور کام کی پیداواری صلاحیت میں کمی واقع ہوتی ہے، مزید کہنا تھا کہ ایک صحت مند، زیادہ پیداواری معاشرے کی تعمیر کے لیے زچگی اور نوزائیدہ غذائیت میں سرمایہ کاری ضروری ہے۔
ڈاکٹر شبینہ رضا نے کثیر شعبہ جاتی تعاون کی اہمیت پر زور دیتے ہوئے کہا کہ ہمیں عوامی اور نجی شعبوں کے درمیان مضبوط شراکت داری کی ضرورت ہے تاکہ ایسے پائیدار حل کو نافذ کیا جا سکے جو اس بات کو یقینی بنائے کہ ہر ماں اور بچے کو ان کی ضرورت کی غذائیت اور صحت کی دیکھ بھال تک رسائی حاصل ہو۔
نیوٹریشن انٹرنیشنل کی رپورٹ میں بتایا گیا ہے کہ کم پیدائشی وزن اکثر قبل از وقت پیدائش یا حمل کے دوران پیچیدگیوں کے نتیجے میں ہوتا ہے، بشمول طبی وجوہات، متعدد حمل، اور زچگی کے انفیکشن کی وجہ سے قبل از وقت لیبر انڈکشن یا آپریشن، دائمی صحت کی حالتیں جیسے ہائی بلڈ پریشر اور ذیابیطس بھی قبل از وقت پیدائش کا سبب بنتے ہیں۔
رپورٹ کے مطابق کم پیدائشی وزن کا ہر کیس تقریباً 10 آئی کیو پوائنٹس کے نقصان سے منسلک ہوتا ہے، جو طویل مدتی ترقیاتی خسارے کا باعث بنتا ہے۔ کاسٹ آف اِن ایکشن رپورٹ میں مزید تخمینہ لگایا گیا ہے کہ پاکستان میں کم پیدائشی وزن کی وجہ سے سالانہ ایک کروڑ 40 لاکھ آئی کیو پوائنٹس ضائع ہو جاتے ہیں، اس کے ساتھ 73,000 نوزائیدہ اموات بھی ہوتی ہیں۔
زچگی کی صحت کی ایک سرکردہ ماہر ڈاکٹر سعدیہ احسن پال نے قبل از وقت پیدائش کو کم کرنے اور محفوظ زچگی کے طریقوں کو یقینی بنانے کے لیے صحت عامہ کی ٹارگٹڈ حکمت عملیوں کی ضرورت پر روشنی ڈالی۔
ان کا کہنا تھا کہ زچہ کی صحت کی دیکھ بھال کی خدمات کو مضبوط بنانا اور قبل از پیدائش کی دیکھ بھال کو فروغ دینا قبل از وقت ہونے سے نمٹنے کی کلید ہے، ہمیں نوزائیدہ بچوں کے لیے خطرات کو کم کرنے کے لیے حاملہ خواتین میں غذائی قلت، انفیکشن اور خون کی کمی جیسے بنیادی عوامل پر بھی توجہ دینی چاہیے۔’
نیوٹریشن انٹرنیشنل کی رپورٹ کا تخمینہ ہے کہ صرف کم پیدائشی وزن 7.1 ارب ڈالر کے سالانہ معاشی نقصان میں حصہ ڈالتا ہے، یہ نقصانات متعلقہ حالات جیسے کہ اسٹنٹنگ اور خون کی کمی سے منسلک اضافی اخراجات سے بڑھتے ہیں، جو مجموعی طور پر غذائیت کی کمی کا کل اقتصادی بوجھ 17 ارب ڈالر سالانہ تک لے جاتے ہیں۔
ورلڈ ہیلتھ اسمبلی (ڈبلیو ایچ اے) نے 2025 تک کم وزن کے حامل افراد کی تعداد کو 30 فیصد تک کم کرنے کا ہدف مقرر کیا ہے، تاہم پاکستان سے بنیادی اعداد و شمار کی عدم موجودگی سے پیشرفت مزید پیچیدہ ہو جاتی ہے۔
ان چیلنجوں کے باوجود، ماہرین صحت زچگی کی غذائیت کو بہتر بنانے، صحت کی دیکھ بھال کے نظام کو مضبوط بنانے اور بچے کی پیدائش کے محفوظ طریقوں کو فروغ دینے کے لیے فوری کارروائی کی ضرورت پر زور دیتے ہیں۔
ڈاکٹر سعدیہ نے نتیجہ اخذ کیا کہ ہماری قوم کا مستقبل اس کے سب سے کم عمر شہریوں کی صحت اور تندرستی پر منحصر ہے، قبل از پیدائش سے نمٹنے اور زچگی کی دیکھ بھال کو بہتر بنانا ایک مضبوط، زیادہ لچکدار پاکستان کی تعمیر کے لیے بنیادی حیثیت رکھتا ہے۔
لائیو ٹی وی