ہنزہ میں لوڈ شیڈنگ کیخلاف شاہراہ قراقرم پر 7 روز سے جاری دھرنا ختم
گلگت بلتستان کے ضلع ہنزہ میں بجلی کی طویل بندش کے خلاف 7 روز سے جاری احتجاجی دھرنا ختم کردیا گیا۔
ڈان نیوز کی رپورٹ کے مطابق دھرنا ختم ہونے کے بعد پاکستان کو چین سے ملانے والی شاہراہ قراقرم ٹریفک کے لئے کھول گئی۔
احتجاجی دھرنے کے منتظمین نے دعویٰ کیا کہ وفاق نے مطالبات پورے کرنے کی یقین دہانی کروائی ہے۔
ان کے مطابق حکومت نے ہنزہ کو تھرمل بجلی کی فراہمی اور پن بجلی گھروں پر کام تیز کرنے کی یقین دہائی بھی کروائی ہے۔
یاد رہے کہ ایک ہفتے سے شاہراہ قراقرم پر جاری دھرنے کے باعث پاک چین تجارت اور خطے میں سیاحت معطل ہوگئی تھی، احتجاج کا آغاز ہنزہ عوامی ایکشن کمیٹی اور آل پارٹیز ٹریڈرز ایسوسی ایشن کی کال پر کیا گیا۔
2 روز قبل گلگت بلتستان چیمبر آف کامرس اینڈ انڈسٹری کے صدر عمران علی نے کہا تھا کہ دھرنے کی وجہ سے پاک چین اقتصادی راہداری (سی پیک) ڈرائی پورٹ پر درآمدات و برآمدات کے سامان سے لدی گاڑیوں سمیت 7 سو ٹرک پھنس گئے ہیں۔
ان کا کہنا تھا کہ چین سے سامان لیکر آنے والے ٹرک ڈرائی پورٹ جب کہ پاکستانی ٹرک مختلف مقامات پر پھنسے ہوئے ہیں جو ڈرائی پورٹ سے سامان ملک کے مختلف علاقوں میں منتقل کرنے کے لیے ہنزہ کی حدود میں موجود ہیں۔
عمران علی کا کہنا تھا کہ اس صورتحال سے تاجر شدید پریشانیوں کے شکار ہیں، ان کے مطابق بارڈر سے برف ہٹانے کے لیے جانے والی مشنری بھی راستے میں پھنس جانے سے بارڈر کو بحال رکھنے کا عمل بھی شروع نہیں ہو سکا ہے، ایسے میں دونوں ملکوں میں گاڑیاں کیسے آ ئیں گی۔
صدر چمبر آف کامرس کا مزید کہنا تھا کہ شاہراہ کی ہنزہ علی آباد میں مسلسل بندش سے سیاحتی سرگرمیوں پر بھی منفی اثرات مرتب ہو رہے ہیں۔
ان کے مطابق متعدد سیاح پاک چین بارڈر میں برف باری کے مناظر سے لطف اندوز ہونے کے لیے آرہے ہیں، وہ بھی واپس جارہے ہیں۔
دوسری جانب کسٹم حکم نے بھی درآمدی اشیا سے لدے ٹرک سی پیک ڈرائی پورٹ پر پھنس جانے کی تصدیق کی تھی۔
لائیو ٹی وی