پی ایس ایل 10: ڈیوڈ وارنر بھی ایونٹ کیلئے دستیاب، ڈرافٹ کیلئے رجسٹریشن کروالی
پاکستان سپر لیگ (پی ایس ایل) کے 10ویں ایڈیشن کے لیے غیر ملکی کھلاڑیوں کی رجسٹریشن کا سلسلہ جاری ہے، جارحانہ مزاج سابق آسٹریلوی بلے باز ڈیوڈ وارنر اور کیوی اسپیڈ اسٹار ایڈم ملنے نے بھی ڈرافٹ کے لیے رجسٹریشن کروالی۔
ڈان نیوز کے مطابق آسٹریلیا کے جارحانہ بلے باز اور بڑے بڑے چھکے لگانے والے کرس لین بھی پی ایس ایل کے ڈرافٹ میں ٹیموں کی توجہ کا مرکز ہوں گے۔
اس کے علاوہ ویسٹ انڈیز کے آل راؤنڈر جیسن ہولڈر بھی رجسٹریشن کروانے والے پلیئرز میں شامل ہیں۔
مذکورہ کھلاڑیوں کی پی ایس ایل 10 کے لیے دستیابی کا اعلان پاکستان کرکٹ بورڈ (پی سی بی) اور لیگ کے سوشل میڈیا ہینڈل کی جانب سے کیا گیا۔
پی ایس ایل 10 میں رجسٹریشن کے بعد ڈیوڈ وارنر نے اپنے ہم وطن کھلاڑیوں عثمان خواجہ، میتھیو شارٹ، شان ایبٹ اور ایلکس کیری کے علاوہ مختلف ممالک کے دیگر پلیئرز کو جوائن کرلیا۔
خیال رہے کہ پلیئرز ڈرافٹ تقریب میں دو دفعہ ایونٹ کا ٹائٹل اپنے نام کرنے والی لاہور قلندرز سب سے پہلے کھلاڑی کا انتخاب کرے گی۔
اسی طرح دوسری باری کراچی کنگز، تیسری کوئٹہ گلیڈی ایٹرز اور چوتھی باری پشاور زلمی کی ہوگی، گزشتہ سیزن میں فائنل کھیلنے والی ٹیم ملتان سلطانز پانچویں اور دفاعی چیمپئن اسلام آباد یونائیٹڈ چھٹے نمبر پر اپنے کھلاڑی چنے گی۔
متعدد بڑے کھلاڑی پہلے ہی ڈرافٹ کے لیے رجسٹریشن کرواچکے ہیں، پی ایس ایل کا ڈرافٹ 11 جنوری کو ہو گا۔
واضح رہے کہ 2016 سے اسلام آباد یونائیٹڈ تین بار چیمپئن بن چکی ہے، جس میں لیگ کا افتتاحی ایڈیشن (2016) تیسرا (2018) اور آخری ایڈیشن (2024) شامل ہے۔
اس کے علاوہ لاہور قلندرز 2022 اور 2023 میں دو بار جیت چکی ہے، پشاور زلمی 2017 کے ایڈیشن کی چیمپئن رہی، کوئٹہ گلیڈی ایٹرز نے 2019 کا ایڈیشن جیتا جب کہ کراچی کنگز نے 2020 میں پہلا ٹائٹل اپنے نام کیا، 2021 میں ملتان سلطانز فاتح بن کر ابھری۔
لائیو ٹی وی