اسرائیل کا بیروت کی عمارت پر میزائل حملہ، 11 افراد شہید
اسرائیلی فورسز کی لبنان کے دارالحکومت بیروت کی ایک عمارت پر تازہ حملے میں 11 شہید ہوگئے۔
برطانوی خبر رساں ادارے ’رائٹرز‘ کے مطابق لبنان کے سیکیورٹی ذرائع نے بتایا کہ اسرائیلی طیاروں نے 8 منزلہ عمارت پر 4 میزائل داغے، جس کا ہدف زیر زمین بنکر بھی تھے۔
اسرائیل، حزب اللہ کے سینئر رہنماؤں کو نشانہ بنانے کے لیے بنکر تباہ کرنے والے ہتھیاروں کو پہلے بھی استعمال کرچکا ہے۔
لبنان کے دارالحکومت میں ہفتے کو علی الصبح 4 بجے اسرائیلی حملے کے نتیجے میں پورا شہر لرز اٹھا اور بارود کی بو شہر بھر میں کئی گھنٹے تک پھیلی رہی۔
(https://www.dawnnews.tv/news/1246757/)[. ]!
بیروت کے جس علاقے میں اسرائیل نے عمارت پر حملہ کیا، یہ علاقہ قدیمی دکانوں کی وجہ سے مشہور ہے، حملے کے بعد ریسکیو اہلکاروں نے تباہ شدہ عمارت کے ملبے کی تلاشی لی۔
رواں ہفتے وسطی بیروت میں اسرائیل کی جانب سے یہ چوتھا فضائی حملہ تھا، اسرائیلی حملے کے نتیجے میں دارالحکومت بیروت کے جنوب میں حزب اللہ کے زیر اثر علاقوں کو بھی کافی نقصان پہنچا تھا۔
اسرائیلی فوج کی جانب سے ہفتے کو جاری ایک بیان میں کہا گیا ہے کہ ’اسرائیلی فضائیہ کی جانب سے بیروت کے جنوب میں حزب اللہ کے مضبوط سمجھے جانے والے مضافاتی علاقوں میں بھی اہداف پر حملے کیے گئے، تاہم اس میں وسطی بیروت پر کیے گئے حملے کا تذکرہ نہیں کیا گیا۔
وسطی بیروت میں اسرائیل کے حملے میں نشانہ بننے والے خاندان کے ایک مرد ہسپتال کے باہر ایک خوفزدہ خاتون کو تسلی دیتے نظر آئے، اس حملے میں ان کی بیٹی بھی زخمی ہوئی ہے۔
اپنی بچی کی تصویر ہاتھ میں تھامے ہسپتال کے باہر موجود نیمر زکریا نامی لبنانی شہری نے بتایا کہ ’حملے کے بعد ہر طرف دھول ہی دھول تھی، متعدد گھروں میں دراڑیں پڑ گئیں، لوگ خوفزدہ ہوکر ادھر ادھر بھاگ رہے تھے‘۔
انہوں نے بتایا کہ میری اہلیہ، میری بیٹی اور ایک رشتے دار خاتون (آنٹی) بھی اس حملے میں زخمی ہوئی ہیں جو ہسپتال میں زیر علاج ہیں، میرے بیٹے کو بھی زخم آئے ہیں۔
لبنان کے سرکاری خبر رساں ادارے کے مطابق اسرائیل نے جنوبی لبنان کے گاؤں رووم پر بھی حملہ کیا جس میں کم از کم 5 افراد شہید اور 2 زخمی ہوگئے۔
لبنان کی وزارت صحت کے مطابق اکتوبر 2023 سے اب تک اسرائیل کے حملوں میں 3 ہزا ر645 افراد شہید جبکہ 15 ہزار 355 سے زائد زخمی ہوچکے ہیں۔
ادھر، غزہ کی وزارت صحت نے آج جاری ایک بیان میں بتایا کہ 7 اکتوبر 2023 سے اب تک کم از کم 44 ہزار 176فلسطینی شہید جبکہ ایک لاکھ 44 ہزار 473 سے زائد زخمی ہوئے ہیں۔
لائیو ٹی وی