اسٹاک مارکیٹ میں زبردست تیزی، 100 انڈیکس 99 ہزار کی بلند ترین سطح پر پہنچ گیا
پاکستان اسٹاک ایکسچینج (پی ایس ایکس) میں آج بھی تیزی کا رجحان دیکھا گیا اور انٹرا ڈے ٹریڈنگ کے دوران بینچ مارک کے ایس ای-100 انڈیکس 2000 پوائنٹس اضافے کے ساتھ پہلی بار 99 ہزار کی تاریخی حد عبور کر گیا۔
پی ایس ایکس ویب سائٹ کے مطابق 9 بج کر 50 منٹ پر بینچ مارک کے ایس ای-100 انڈیکس 1158 پوائنٹس یا 1.19 فیصد اضافے کے ساتھ 98 ہزار 486 پر پہنچ گیا۔
بعد ازاں کاروباری ہفتے کے آخری روز انٹرا ڈے ٹریڈنگ کے دوران مارکیٹ میں مزید تیزی دیکھی گئی اور 11 بج کر 10 منٹ پر ایس ای-100 انڈیکس 2 ہزار 57 پوائنٹس اضافے کے ساتھ تاریخ کی بلند ترین سطح 99 ہزار 385 پر پہنچ گیا۔
تاہم، کاروبار کے اختتام پر یہ رجحان برقرار نہ رہ سکا اور کے ایس ای-100 انڈیکس 469 پوائنٹس یا 0.48 فیصد اضافے کے ساتھ 97 ہزار 798 پر بند ہوا، جو گزشتہ روز 97 ہزار 328 پر پہنچا تھا۔
گزشتہ کئی روز سے اسٹاک مارکیٹ میں مثبت رجحان دیکھا جا رہا ہے جب کہ گزشتہ روز پاکستان اسٹاک ایکسچینج انٹرا ڈے ٹریڈنگ کے دوران 1700 پوائنٹس اضافے کے ساتھ پہلی بار 97 ہزار کی تاریخی حد عبور کر گیا تھا۔
اے کے ڈی سیکیورٹیز کے ڈائریکٹر ریسرچ اویس اشرف نے کہا تھا کہ بینچ مارک میں تیزی کی وجہ رٹیلائزر سیکٹر کی کارکردگی ہے۔
انہوں نے مزید کہا تھا کہ فوجی فرٹیلائزر کمپنی (ایف ایف سی) اور فوجی فرٹیلائزر بن قاسم لمیٹڈ (ایف ایف بی ایل) کے منافع کی وجہ سے مارکیٹ میں مثبت رجحان ہے اور اس کے باعث سیاسی خدشات پس منظر میں چلے گئے ہیں۔
اویس اشرف نے کہا تھا کہ جب لوگ موجودہ سیاسی بے یقینی صورتحال کی وجہ سے محتاط رہتے ہیں تو ادارے مقررہ آمدنی میں کمی اور میکرو اکنامک آؤٹ لک میں بڑھتے اعتماد سے حوصلہ پا کر فعال طور پر اپنا ایکویٹی پورٹ فولیو بنا رہے ہیں۔
ٹاپ لائن سیکیورٹیز کے چیف ایگزیکٹیو محمد سہیل نے بھی اسی طرح کے خیالات کا اظہار کیا تھا اور کہا تھا کہ آج اسٹاک مارکیٹ میں تیزی کی قیادت کھاد سیکٹر نے کی۔
چیس سیکیورٹیز کے ڈائریکٹر ریسرچ یوسف ایم فاروق نے کہا کہ آج مارکیٹ میں تیزی پی آئی بی [پاکستان انویسٹمنٹ بانڈز] کے منافع میں کمی کی وجہ ہے جب کہ فنڈز، انشورنس کمپنیاں، اور انفرادی سرمایہ کار بتدریج فکسڈ انکم انسٹرومنٹس سے ایکویٹی کی طرف منتقل ہو رہے ہیں۔
لائیو ٹی وی